Venta fire timar på akutthjelp

Eidsheim er rullestolbrukar og er heilt avhengig av at både rullestol og trygdebilen fungerer for å koma seg nokon veg. Tysdag var han i Åsane. På veg inn att i bilen fungerte ikkje heisen. Dermed hadde han ikkje moglegheit til å koma seg derifrå, og ringte vakttelefonen til NAV Hjelpemiddelsentralen på Kokstad. Denne har opningstid frå klokka 16 til midnatt, slik at dei skal kunna rykka ut dersom brukarane av utstyret treng akutt hjelp.

Store problem
? Då eg ringde vakttelefonen klokka 12.30, nådde eg berre fram til ein automatisk telefonsvarar. Eg kunne leggja igjen ei melding, og det gjorde eg, fortel Eidsheim.
Men ingen ringde tilbake, og ingen hjelp var å få. Eidsheim køyrde då med rullestolen bort til ein butikk i nærleiken, og spurde om dei kunne hjelpa. Ein mann jekka då opp heisen med Eidsheim og rullestolen på, slik at han kom seg inn i bilen og fekk køyrd frå staden.
Men utan bilheis som fungerte, var det ikkje lett for Eidheim å koma seg ut av bilen og inn i huset heime i Hillesvåg. Han prøvde fleire måtar, og klarte til slutt ved hjelp av krykker å koma seg bort til den manuelle jekken. Han fekk då jekka ned heisen og rullestolen, fekk slept seg oppi den elektriske rullestolen og kom seg i hus. Men då klarte han ikkje å lata att bilen, og dørene bak stod på vid vegg heilt til Strilen kom heim til Eidsheim klokka 16.00. Først under intervjuet, klokka 16.15, ringde dei frå Hjelpemiddelsentralen og spurte om han trong assistanse, altså nær fire timar etter at han bad om akutt hjelp.
? Det er helit utruleg at det ikkje er eit betre system enn dette. Me er trass i alt i 2006, seier Eidsheim, som tek opp saka av omsyn til andre som kjem i liknande situasjonar, og som kanskje har endå større handikap enn han sjølv.
? Det er hårreisande at mannen måtte venta så lenge på å få hjelp, seier Alf Are Skog, organisasjonskonsulent i Noregs Handicapforbund Sørvest.
Same dag sende han ein e-post til Hjelpemiddelsentralen om saka.
? Telefonbetjeninga til Hjelpemiddelsentralen er eit kjempeproblem, som me har teke opp fleire gongar tidlegare. Folk må ofte venta lenge på svar, og nokon gongar tek det dagar før folk får tilbakemelding, seier Skog.

Tek ikkje sjølvkritikk
Hjelpemiddelsentralen tek ikkje sjølvkritikk i saka.
? Nummeret for akutt reperasjon trer først i kraft etter klokka 16 på ettermiddagen. Før det skal folk som treng hjelp, ringja 55 52 67 00, som er det vanlege nummeret til Hjelpemiddelsentralen, seier leiar Klaus Finne ved teknisk avdeling.
Han hevdar og at Eidsnes skal kjenna til dette. Finne kjenner til at det til tider har vore vanskeleg å koma gjennom til sentralen, men at det ikkje er eit stort problem. Han seier dessutan at Hjelpemiddelsentralen i Bergen kom godt ut i den siste landsomfattande undersøkinga om akutt hjelp. Her fekk dei god tilbakemelding også frå brukarane.
Når nokon ringjer og bed om akutt hjelp til reparasjonar, rykker Hjelpemiddelsentralen anten ut sjølv, eller dei kontaktar Falken eller leverandøren av det tekniske utstyret, fortel Finne.