Ventebøyer aktuelt ved Fonnesflaket

Fensfjord Mooring AS arbeidde tildlegare med planar om å leggja ut ventebøyer for stor skip i Masfjorden sin del av Fensfjorden. Men dette vekte stor motstand, og kommunestyret fjerna ankringsområdet for skip frå kommuneplanen.
No har same selskapet søkt om å få leggja ut to ventebøyer på Fonnesflaket i staden. Den eine bøya ligg ikkje så langt frå ferjeleiet i Leirvåg, den andre lengre vest, like aust for Storestonga.

Ankringsområdet
Deler av Fonnesflaket vert alt no bruka som ankringsområde, men då for mindre skip. Fensfjord Mooring vil forankra ventebøyene i sjøbotnen, og dei skal kunna ta mot skip opp til 160.000 dødvekttonn, og ei lengde opp til 280 meter.
Selskapet seier i søknaden sin at ventebøyene ikkje skal påverka skipstrafikken i området.

Tvist i Gulen
Fenfjord Mooring ønskjer framleis å leggja ut ei bøye i Gulen, utanfor Stangeneset. Dette er ei posisjon som Gulen og Masfjorden Utbyggingsselskap i si tid fekk løyve til, men som dei aldri har teke i bruk. Der er no ein tvist om Fensfjord Mooring kan nytta denne lokaliteten eller ikkje. Kystverket meiner dei kan, men samstundes seier dei at dette er ei sak som GMU og Fensfjord Mooring må rydda opp i.

Miljøgevinst
Fensfjord Mooring meiner det er ein klar miljøgevinst ved at skip ligg i ventebøye medan dei ventar på å koma til på Mongstad eller Stura, i staden for å liggja å driva eller liggja for anker. Då treng dei ikkje bruka olje til motorane. I tillegg meiner Fensfjord  Mooring at ventebøyer er mykje sikrare mot ulukker enn at skip ligg for anker.
Dei ser og for seg at det kan utførast serviceoppdrag på båtane medan dei ligg i ventebøye. Dette kan gje oppdrag for lokale verksemder.
Det har ikkje lukkast Strilen å få ein  kommentar frå Fensfjord Mooring til søknaden.

Det er Kystverket som godkjenner utlegging av ventebøyer, og dei har no sendt saka ut på høyring.  Høyringsfristen er sett til 10. september.