Vetås-utviding med i kommunedelplanen

Det er konsulentfirmaet Asplan Viak som på vegner av RadøyGruppen har laga ein plan for utviding av industriområdet på Vetås. Fredag før palmelaurdag var Asplan Viak på Radøy for å drøfta saka med representantar for Radøy kommune, og også Fylkesmannen og Lindås kommune var representert.
? Planområdet for kommunedelplanen er no utvida til å gjelda ein bit av Lindås, den delen som ligg rett sør for RadøyGruppen sitt areal, seier plankonsulent i Radøy kommune Kjersti Flatråker.
Representantar for Frank Mohn har tidlegare signalisert til Strilen at verksemda kan vera interessert i å etablera seg på dette området i Lindås, tett opp til kommunegrensa mot Radøy.
? Me vonar at kommunedelplanen skal vera klar til å sendast ut på første gongs offentleg ettersyn før sommaren, seier Flatråker.
Radøy kommune vil i sitt arbeid gjera ei vurdering av kva konsekvensane vert av ei mindre utviding av RadøyGruppen sitt anlegg. Dersom det er fleire selskap som skal ha plass på Vetås må det gjerast ei større utgreiing, noko selskapa sjølve eventuelt må ta kostnaden med.
? Kommunedelplanen for Radøy sør kan kanskje verta vedteken før jul, seier plankonsulent Flatråker.
Ho legg til at dersom det kjem inn mange merknader til planen, vil kommunen syta for at det vert ein god handsamingsprosess for desse.
Kommunedelplanen for Radøy sør strekkjer seg frå kommunegrensa i sør, og no altså også med ein liten bit av Lindås. På austsida av Radøy går planområdet til og med Olsvollstranda, og på vestsida til og med Sæbø.