Vil aksjonera mot tildekking

? Ei tildekking er ikkje noko varig løysing. Den vil garantert verta øydelagd av straumar og tæring på betongen. Då er det betre at ubåten vert liggjande som han er til ein har ei sikker løysing for å heva han, seier Magne Rødland til Strilen.
Rødland understrekar at han seier dette som privatperson og ikkje som distriktssjef i Sjøfartsdirektoratet.
? Eg kom til at eg berre måtte uttala meg i denne saka, seier Rødland, som først vart intervjua om dette i NRK.

Sjømann
Rødland har mange år bak seg som sjømann  og kaptein, og det er ut frå kjennskap til straumtilhøva ved Fedje han meiner at ei tildekking av ubåten med ei sementkappe, slik fiskeriministeren har bestemt, er ei svært dårleg løysing.
? Ei slik tildekking vil verta undergraven av straumane og rørsler i grunnen, slik at sjøvatnet igjen vil koma i kontakt med kvikksølvflaskene, seier Rødland.
Han trur og at sementen etter kvart vil verta opptært av sjøvatnet, og dermed kan kvikkfølvet koma ut i sjøen.

Finst løysing
?Eg er ikkje fagmann på heving, men så vidt eg har forstått, skal det vera tilgjengeleg løysingar i dag, seier han.
Men det viktigaste for han i denne fasen er at løysinga med tildekking vert stansa, og han seier seg villig til å aksjonera for å hindra at dette skjer.
På spørsmål om kvifor Kystverket har tilrådd tildekking, svarar han.
- Det vil eg ikkje uttala meg om. Det er Kystverket sitt ansvarsområde.
Førstkomande måndag skal det vera ei ny høyring om ubåtvraket i Stortinget.

Denne veka har også Norges fiskarlag gått klart ut og krevd at ubåten vert heva av omsyn til fiskeriressursane langs kysten. Ein fryktar at viss kvikksølvet kjem ut i sjøen, kan det ureina havet langt oppover kysten på grunn av at straumane i havet går nordover langs kysten frå Fedje.