Vil ha fleire hus nær Knarvik sentrum

I ein uttale til kommunedelplanen ser dei næringsdrivande gjerne at Lindås kommune opnar for fleire bustader nær sentrum av Knarvik enn det framlegget planen legg opp til. Uttalen er frå Knarvik Senterforening, huseigarane i senteret og Knarvik næringsforening, som har sendt inn ein felles uttale.
Det vert vist til at høg konsentrasjon av busetnad nær regionsenter er i tråd med rikspolitiske retningslinjer for samordna areal- og transportplanlegging.
Dei næringsdrivande stiller seg bak kommunen sitt planframlegg. Etter det skal Knarvik utviklast til «ein bymessig stad med handel, service og tenesteytande næringar kombinert med bustader».

Samanblanding
I uttalen vert det peika på at senteret i dag opplever «ei lite føremålsteneleg samanblanding av biltrafikk og gangtrafikk som følgje av at plasskrevjande varehandel som krev bil til døra i dag er plassert i senteret». Å få denne typen handel i eigne næringsområde utanfor sjølve senterkjernen vil betra forholda for alle partar, meiner dei næringsdrivande på begge sider av E39.
Det vil kanalisera mykje trafikk utanom senteret «til meir eigna område for varetrafikk langs hovudvegane», heiter det i uttalen. Det vert og vist til at dette er argument Miljøvendepartementet meiner rettleiar kommunane til å følgja. Her heiter det at «Salg av plasskrevende varer bør fortrinnsvis ligge i randsonen til et stort eller mellomstort senter».
«Eit slikt skilje er også naudsynt for å oppnå målet om ein bymessig stad i Knarvik sentrum», heiter det i uttalen frå dei lokale næringsdrivande.

Motsegn
Elles kan ei motsegn frå Fylkesmannen føra til ei viss forseinking av kommunen si behandling av kommunedelplanen.
Det framlegget frå kommunen manglar, er nemleg ei konsekvensutgreiing, og det gjer at Fylkesmannen kjem med mosegn etter «Forskrift T-1146». Utan ei slik utgreiing kan ikkje Fylkesmannen ta stilling til eller gje detaljerte kommentarar til planen.
Ut over dette får framlegget karakteren «grundig og godt arbeid», men Fylkesmannen kunne tenkt seg ein meir konkret omtale av kva bruk som er tenkt for dei enkelte områda, i sær næringsområda.
Nye næringsområde som er føreslegne i planen, er ei utviding av det ikkje utbygde området ved den planlagte nye Rv 565 bak Hordasmia/Isdalstø og på delar av småbruket som Olav Kåre Vatnøy eig i Gjervik.
På illustrasjonar kommunen sjølv har laga i samband med planarbeid, er det vist bygg med fleire etasjar enn det er bygd så langt i Knarvik. Om det skal opnast for meir enn fire etasjar som i dag, må avklarast i dei konkrete reguleringsplanar, ikkje i kommunedelplanen.