Vil ha med seg kontainer med hjelp heim

? Eg har tenkt på det lenge at eg ville prøva å starta ei innsamling for å ha noko med når eg reiser heim på besøk, seier Abubakar Barry til Strilen.
Og no har han bestemt seg. Viss folk har klede, sko, barneleiker og anna som kan koma til nytte i landbyen hans, tek han mot med takk.
? Og så har eg lyst å gje noko til skulen eg gjekk på då eg var liten. Det kan vera skrivebøker, blyantar, fargeblyantar og anna utstyr som dei manglar heime, seier han.
Også rullestolar, krykker og anna som eldre og uføre kan ha nytte av, er han takksam for å få. Der er også eit sjukehus i nærleiken som kan trengja utstyr, fortel han.

Første gong
Abubakar Barry har budd i Noreg sidan 1999, då han kom hit som flyktning frå borgarkrigen i heimlandet Sierra Leone i Vest-Afrika. Først budde han i Lindås, og no på Flatøy. Då Abubakar kom til Noreg, hadde han vore fleire år som flykting i Liberia, nabolandet til Sierra Leone.
Etter mange år med svært blodig borgarkrig er det no fred i heimlandet hans, slik at han kan reisa heim. Men folk manglar det meste.
Ein annan grunn til at Abubakar Barry først no kan reisa heim på besøk, er at han i sommar får norsk statsborgarskap og norsk pass.
? Eg har stor familie, og mange av slektningane mine har eg aldri sett, så det vert spennande. Men i heimlandet mitt er det og slik at når nokon kjem heim, er det ikkje berre familien som møter opp, men heile landsbyen. Då ville det vore kjekt å ha noko å gje til alle, seier Abubakar til Strilen.

Kontainer
Viss det går slik han håpar, skal han fylla ein heil kontainer med utstyr og senda den med båt ned til heimlandet. Men den turen tek seks veker, så han har ikkje så god tid på seg viss kontaineren skal vera framme når han kjem ned i juli.
? Dette er ei heilt privat innsamling som eg har starta, men eg har fått avtale med arbeidsgjevaren min Frekhaug Vinduet om at eg kan lagra sakene der til dei skal sendast nedover, seier han.

Feriepengar
Abubakar Barry har jobba i seks år hos Frekhaug Vinduet, der han no er på lageret.
? Men å senda ein heil kontainer til Sierra Leone kostar vel mykje?
? Ja, det kjem på rundt 30.000 kroner. Eg har tenkt å bruka av feriepengane mine, men viss der er nokon som vil gje pengar til frakta, er eg glad for det.
Abubakar veit ikkje om prosjektet hans vil lukkast, og om folk vil hjelpa han, men han må i alle fall prøva.
? Her i Noreg kastar folk mykje som er fullt brukande, og som kunne koma til nytte der nede. Der manglar dei det meste, påpeikar han.
Men elektriske artiklar er det ikkje vits i å gje, for i landbyen hans er der ikkje straum.