Vil ha meir tid til ho Vigdis

Tre dagar på overtid vart Olav Steinar Namtveit torsdag invitert på bursdagsfest av kollegar i Radøy kommune. På menyen stod hjortegryte og «sekstiårsbrød», og rundt borda sat bortimot femti gjestar som omtrent slåst om plassen på talelista. Den første av dei seksten taletrengte, var fylkesmannen.
Det er to ting som overraskar meg. Den eine er kvifor du ikkje stiller til attval til hausten. Men det forstår eg jo når eg ser smilet ditt på songheftet der du heldt eitt av dei elleve barneborna dine på armen. Det andre er korleis du har klart å stå løpet ut utan noko teikn til nedtrapping, sa Svein Alsaker.

Kulturordføraren
Alsaker rosa jubilanten som ein samarbeidets mann, som ikkje berre har vore samlande for Senterpartiet, men for heile kommunen. I tillegg har du betydd mykje både som KS-leiar og som leiar i regionrådet, sa han.
Han trekte også fram ordføraren si genuine interesse for kultur.
? Det er ikkje for ingenting at kommunen har så høgt nivå på kulturen og at Radøy vert trekt fram både når det gjeld kulturlandskap og kultur elles. Og du er alltid til stades både på små og store hendingar. Du fortener absolutt tittelen kulturordførar, sa han.
Alsaker peika også på Namtveit si gode økonomistyring, ryddigheit og gode oversikt i dei seksten åra som ordførar.
Du har fått utført mykje som du kan vera stolt av. Radøy har hatt ei god utvikling på mange område i tida du har vore ordførar, sa Alsaker.

Kanskje pensjonist
Om ordføraren pensjonerer seg for godt til hausten eller om han går tilbake til gamlejobben som avdelingssjef for bygdeutvikling i landbruksetaten hjå fylkesmannen (no Innovasjon Norge), har han ikkje bestemt seg for enno.
? Først og fremst vil eg vera meir heime med Vigdis og bruka meir tid på dei fire døtrene og elleve barneborna våre. Elles kjem eg framleis til å bruka mykje tid på kultur og på eit restaureringsprosjekt eg har på gang på mor mi sitt gamle hus i Sunnfjord. Eg får nok ikkje fritidsproblem med det første, ler han.
Skal du feira meir?
? Ja, dette er berre ein forsmak. Fredag kveld er det ope hus.