Vil ha nytt allhus i Alvermarka

27. september vert det bygdemøte på Alver Hotel, der planane for eit forsamlingshus vert lagde fram.
- Alvermarka/Ikenberget er no det største byggjefeltet i Lindås kommune med rundt 450 bueiningar. Då treng me eit betre forsamlingshus enn dette, seier Arne Sæbø i styret i Ikenberget Vel når han møter lokalavisene i det eksisterande velhuset ved sida av idrettsbana i Alvermarka.
Han får full støtte av Geir Vatnøy i styret i Alvermarka Vel og Øystein Sylta i firmaet Alver Design. Saman med Ståle Hauge og Øyvind Korsøen har dei site i ein komité som har laga førebelse planar for eit nytt forsamlingshus på same tomta som velhuset ligg i dag. Oppdraget har dei frå styra i dei to velforeiningane.

Må ha folk med
- Men skal det verta eit forsamlingshus, må me ha folk med oss, seier Sæbø.
For å orientera om planane vert det innkalla til bygdemøte på Alver Hotel tysdag 27. september.
- Dette vert eit møte for hele Alversundkrinsen, ikkje berre Alvermarka og Ikenberget, presiserer Sæbø.
Der skal dei ikkje berre presentera planane for eit forsamlingshus, men diskutera dei utfordringane Alversund-krinsen står framfor i åra framover. Denne krinsen har no den største veksten i Lindås, med store barnekull.
- Me skal ha med oss folk frå lensmannskontoret, som vil fortelja om utfordringar dei ser, fortel Sæbø.
Ordføraren i Lindås har sagt ho vil koma, og det same vil ungdomskontakten.

Allbrukshus
På møtet vil planane for det nye forsamlingshuset verta lagde fram.
- Me ser for oss eit allbrukshus med gymsal/storsal med scene, som skal kunna brukast både til idrett som volleyball og innebandy, til teater og revyar og på store dagar som 17. mai og jonsok, seier Øystein Sylta, som har laga utkastet.

Kino og ungdomsklubb
Den delen av bygget som ligg lengst nedover, skal ha to etasjar. I kjellaretasjen vert det stort kjøkken og garderobar med dusj for begge kjønn.
- Det er eit sakn slik som det er no for dei som bruka idrettsplassen, seier han.
I andre høgda er det planlagt møterom og eit mindre tekjøkken.
- Me tenkjer oss eit bygg som kan romma både ungdomsklubb, kino, ein treffstad for eldre og eit lokale som kan leigast ut til runde dagar, konfirmasjonar og bryllaup, seier Sæbø.
Han trur eit slik hus kan ha mykje positivt å seia for utviklinga i bygda.
- Me har fått vurdert bygget som står her no, men det er i så dårleg stand at det ikkje er noko å vøla på, seier han.
Velhuset er brakker som dei fekk frå Mongstad for 20-25 år sidan.
Det nye bygget vil vera på rundt 350 kvadratmeter og vil kosta nokre millionar.
- Me satsar på eit enkelt, men funksjonelt bygg, seier Sylta.

Dugnad
Men skal det verta meir enn luftige planar, krev det at folk i bygda sluttar opp, og då må folk i første omgang møta på allmøtet den 27.
- Sjølv om me tek sikte på å finansiera ein god del ved spelemidlar, og at kommunen stiller tomta gratis til rådvelde, må me ha ein god del eigeninnsats, og det vil vera i form av dugnad, seier Sæbø.
Det kan også vera aktuelt å gå ut med teikning av aksjebrev for å skaffa pengar til bygget.
- Og så ser me for oss at me kan leiga inn lokale firma på timebasis til å gjera ein del av jobben, men sjølve bygget må me ha entreprenør til å setja opp, seier Sæbø.

Klart i 2008
Viss folk stiller opp, og det offentlege yter dei naudsynte midlane, ser initiativtakarane for seg byggjestart tidleg i 2007, og at huset kan takast i bruk i løpet av 2008.
- Reaksjonane så langt frå dei som har høyrt om planane, er eintydig positive, seier Sæbø.
Både han og dei to andre i komiteen har difor god tru på at huset vert ein realitet.