Vil ha tunnel under Alverstraumen

? Sentrumsområdet i Alversund er under sterkt utbyggingspress. Me kan ikkje gå med på at området vert oppete bit for bit til vegføremål og bustadbygging. Difor ser me ein lang tunnel frå noverande riksveg på Alverflaten, under Alverstraumen og opp igjen på Remme som den beste løysinga når det gjeld ny veg til Radøy, seier Lars Øyvind Hillestad til Strilen.
Hillestad er leiar i Alversund grunneigarlag. Saman med styra i Alvermarka Vel, Ikenberget Vel og ei interessegruppe på Tveiten vil grunneigarlaget lansera desse planane på eit folkemøte i Alversund onsdag kveld.

Bort frå skulen
? Med ei slik løysing vil me mellom anna løysa trafikkproblema ved Alversund skule, der mange born i dag må kryssa den sterkt trafikkerte riksvegen, påpeikar Hillestad.
Løysinga inneber og at ein slepp å bruka areal i dalsøkket bak Alver Hotel til veg, slik Statens vegvesen og Lindås kommune har føreslått i den nye kommunedelplanen for Knarvik/Alversund. Det er den som er bakgrunnen for at desse planane no vert lagde fram.
Løysinga sparer også øyane i Alverstraumen for utbygging. Den 50 år gamle Alversundbrua er snart sprengd, og eit nytt hovudsamband til Radøy må byggjast innan ikkje så alt for fjern framtid.

Gripa sjansen
? Det er no me som bur i Alversund-krinsen har ein sjanse til å seia korleis me vil bygda vår skal utviklast. Seier me ikkje frå no, risikerer me at planane går vidare etter det alternativet som vegvesenet og kommunen har lagt fram, seier Hillestad.
Han meiner ein 2,5 kilometer lang tunnel under Alverstraumen ikkje er noko urealistisk prosjekt.
? Der tunnelen kjem opp på Remme, kan det byggjast ein arm mot Hilland. Då vil ein får utløyst store tomteareal der, påpeikar Hillestad.
For interessefellesskapet som lanserer tunnelplanane, har også meiningar om kor tomteareal og næringsareal i krinsen bør vera.
? Og me meiner at heile Alversundkrinsen bør trekkjast inn i planområdet, både Kvamme, Sellevoll, Litleskare og Hilland.
Onsdag kveld vert det folkemøte om kommuneplanen på Alversund skule. Hillestad håpar at riktig mange møter fram og seier si meining.