Vil ha ungdomsklubb og klubbhus i felles lokale

Det er ikkje sett av pengar nok til å gjera idrettsparken heilt ferdig, og no må klubbhuset venta medan kommunen ser på ei mogleg fellesløysing med klubbhus for AIL og nye lokale for ungdomsklubben.

Lokala som ungdomsklubben har i dag er ikkje tenlege. I eit notat om situasjonen skriv kulturavdelinga i kommunen at det gamle kommunehuset er i dårleg stand, med lekkasje og lukt av både mugg og kloakk.

Ungdomsklubben har ein gledeleg medlemsauke med 40 ungdommar innom dørene til vanleg, og over 70 enkelte kveldar. Men medlemsauken gjer situasjonen med dei dårlege lokala berre meir prekær, med fullt hus vert det trongt om plassen og dårleg luft. Kulturavdelinga peikar på at ei plassering i idrettsparken vil vera betre også for at ungdommane skal vera aktive kvar dag, noko som er eit mål for alle i kommunen.

Løpebane og gjerde
I første omgang legg administrasjonen opp til at Austrheim idrettspark vert gjort førebels ferdig med flomlys, gjerde rundt bana, og garasje til maskiner og utstyr, slik at anlegget kan takast i bruk.

Arbeidet med løpebana har stått på vent på grunn av vêrforholda, men dette skal kunna gjerast ferdig no slik at kunstgrasbana og løpebana kan takast i bruk no i haust.
Arbeidet med klubbhuset vert sett på vent, for å avklara økonomien i heile prosjektet, og herunder også den moglege husdelinga med ungdomsklubben.

Lik prioritering
Administrasjonen peikar på at ei samlokalisering vil gje ei lik prioritering av desse to gruppene, både dei som driv med organisert idrett, og dei som brukar ungdomsklubben.

Det kan gje ein meir rasjonell bruk av lokala, det kan vera rimelegare, og det vil gje ein møteplass på kveldstid mellom det som kan vera to ulike grupper med ungdommar i Austrheim kommune.

Det som er lista opp som argument mot ei fellesløysing, er at sambruk kan føra til kollisjonar på bruk av lokala, at ingen av dei to brukarane vil få «sitt eige» hus, og at ei fellesløysing ikkje kan ha garderobar og dusjar i klubbhuset, slik at dette må skje i Austrheimhallen som i dag.

Spelemidlar
Administrasjonen peikar på at oppsettet for spelemidlar neppe går inn. Det er rekna inn 700.000 kroner i spelemidlar til tre deler av prosjektet, både til klubbhus med rom for møte og arrangement, til garderobar og dusjar, og til hus for vedlikehald, utstyr og materiell.

Sjølv om det rett nok er mogleg å få utbetalt 700.000 kroner i spelemidlar til kvar av desse tre delane, er det også eit vilkår om at spelemidlane ikkje skal utgjera meir enn ein tredel av byggekostnaden. Huset er i dag kostnadsrekna til 6 millionar, og dermed vert spelemiddeldelen også mindre.

Administrasjonen meiner vidare at det ikkje er mogleg for Austrheim idrettslag å gjera dugnadsarbeid på parken for to millionar kroner, for så langt er det ikkje utført noko dugnad. Dermed ryk også denne delen av budsjettet.

Ein del att
Det er ein del meir enn huset som står att før idrettsparken er ferdig. Til tribuneanlegget er det lagt opp stein i skråning, men kostnaden med å gjera dette til ein tribune er uviss. Uviss er også kostnaden til grøntanlegg og avslutning.

Administrasjonen ønskjer å gjera ein grundig gjennomgang av heile prosjektet, for å få klarlagt kva det vil kosta å få eit samla og ferdiggjort prosjekt. Saka skal opp i formannskapet torsdag 6. okto-ber, og til kommunestyret onsdag 19. oktober for endeleg avgjerd.