Vil ikkje avstå grunn til skytebane i Haukåsen

Olav Mellingen har i brev til Det frivillige skyttervesen sin advokat Sven Knagenhjelm gjort det klart at han ikkje frivillig avstår grunn til skytebane i Haukåsen på Radøy. Mellingen hadde frist til 7. august med å svara på dette.
Men Mellingen ønskjer også å få klarlagt om styret i Radøy skyttarlag går inn for å oreigna grunn hos han, eller om det er Det frivillige skyttervesen sentralt som pressar på.
Mellingen viser i brevet til at nestleiar Andre Michelsen i kommunestyret sa uttrykkeleg frå om at det ikkje var aktuelt for skyttarlaget å oreigna grunn. Står styret i skyttarlaget fast på dette? vil Mellingen vita.
Han meiner og at då kommunestyret vedtok reguleringsplanen for Haukåsen, vart det lagt inn ein klausul om at oreigning ikkje var aktuelt. Står politikarane fast på dette, no i valkampen? spør Mellingen.
Mellingen er dei einaste av grunneigarane som ikkje frivillig vil avstå grunn til skytebane. Dei andre to har akseptert tilbodet dei har fått om ti kroner kvadratmeteren for grunnen.
Kommunestyret har i sitt fleirtalsvedtak sagt at kommunen skal prøva å mekla dersom ikkje skyttarlaget får ein frivillig avtale med alle grunneigarane.