Vil ikkje ha veg forbi husa sine

Det vert arbeidd med planar om å byggja veg på fylling til Matresøya. Tanken er at øya kan gje plass for nye hus i Matre-bygda. Men folk i byggefeltet Rabbane på Matre (markert med raud pil) fryktar at vegen til øya skal koma rett forbi husa deira. Difor har dei kome med innspel til kommunen om korleis dei kan tenkja seg vegen til øya.

– Det er born som leikar her i byggefeltet, og me ønskjer ikkje å få trafikk rett forbi husa våre, seier Frode Oppedal til Strilen.

Oppedal er ein av 13 som har skrive under eit felles brev til kommunen.

Totalt er det 13 born i skulealder og yngre i dette feltet. Ein fryktar også støy og støv frå aukande trafikk.

På fylkesvegen
– Me ønskjer at vegen skal følgja fylkesveg 382 ned til hotellet og kryssa over til øya derifrå, seier Oppedal.

Aller helst vil ein at det vert bygd ny bru over elva på Matre, slik at trafikken frå E39 ikkje treng nytta eksisterande bru i det heile.

– Men det viktigaste for oss er at vegen ikkje svingar ned forbi byggefeltet vårt, slik det har vore antyda, seier Oppedal.

Friområdet
Bebuarane er også redde for at ein ny veg kan øydeleggja friområdet i Våganeset. Her er det utført mykje dugnadsinnsats, og Våganeset er mykje nytta av folk på Matre.

Ein tilkomstveg gjennom Rabbane vil føra til betydeleg auka risiko og sjenanse for dei som bur der, og vil ikkje verta akseptert, heiter det i brevet.

Det er ikkje teke endeleg stilling til om det skal byggjast veg til Matresøya eller ikkje. Steinmassar frå BKK si utviding av kraftstasjonen på Matre er tenkt brukt til vegfyllinga.