Vil krevja politivakt på alle skuledansar

Det var elevar ved Austrheim vidaregåande skule som arrangerte dansen, som var eit lukka arrangement med førehandspåmelding. Bråket starta då ei gruppe unge, som ikkje hadde noko på dansen å gjera, samla seg utanfor samfunnshuset. Dei som var involverte i bråket kjem frå ulike kommunar i regionen, og er kjenningar av politiet, opplyser Tofting. To ungdommar er så langt anmelde, men det kan og verta snakk om fleire.

Krev politivakt
Tofting seier at desse ungdommane ofte brukar å dukka opp når det er slike arrangement i regionen.
? Det er no bestemt at ein vil krevja politivakt på alle skuledansar i heile Nordhordland, seier Tofting.
Dette vert fort ein ekstra kostnad for arrangørane på rundt 5.000 kroner.
Sidan arrangementet i Austrheim var eit lukka arrangement, rekna lensmannen med at dette skulle gå greitt. Men det gjorde det altså ikkje.

Skadeverk og slåssing
Det oppstod slåssing på arrangementet, men ingen skal ha fått behov for legebehandling etter dette. Ei jente fekk ei flaske i hovudet slik at ho byrja å blø, ein gut vart skadd i fingarne, men ikkje noko alvorleg, seier politibetjent Kurt Inge Hordvik frå Lindås og Meland lensmannskontor. Politiet vart kontakta litt etter midnatt, og rykte ut med tre personar. Dei var der til festen var slutt, ca. kl. 01.30.
I tillegg til slåssing var det snakk om drikking på offentleg stad og skadeverk, opplyser Hordvik.
Blant anna skal ein vask og eit toalett ha vorte knust i samfunnshuset.