Vil kutta Miljøkortet

Frå nyttår vart prisen på klippekort på buss mellom Bergen og Frekhaug/Knarvik sett ned med 200 kroner pr. månad til 630 kroner. Dette for å lokka folk til å ta bussen i staden for å køyra privatbil då bompengane på Nordhordlandsbrua forsvann. Salet av kort har auka med 6,1 prosent og passasjertalet med 13,1 prosent, men det er ikkje nok til at fylkesrådmannen går inn for å forlenga ordninga ut over prøveperioden til 31. mai. Fylkesrådmannen vil heller ikkje innføra tilsvarande ordningar mot Askøy, Sotra eller Os.

Verdfullt
Det er fylkeskommunen som vedtek busstakstane, og det er difor fylkesutvalet som bestemmer om ordninga med Miljøkort skal halda fram. Saka kjem opp i samferdselsutvalet neste veke og i fylkesutvalet 15. mai.
Fylkesrådmannen meiner erfaringa med Miljøkort har vore verdfull, men tykkjer ikkje verknaden har vore så god som ein kunne ønskja. Han viser særleg til at trafikken over Nordhordlandsbrua har auka med 22,4 prosent.

Andre tiltak
Kostnaden med å halda fram ordninga med Miljøkort i Nordhordland ville på årsbasis ha kosta fylkeskommunen 2,1 millionar kroner. I tillegg kjem 400.000 kroner til marknadsføring. Det er meir enn det var budsjettert med.
Fylkesrådmannen vil heller satsa på andre tiltak for å få folk til å reisa kollektivt. Han går også inn for at det utvida tilbodet med direktebussar mellom Nordhordland og Bergen vert halde oppe.