Vil leggja ned Hordabøheimen

Framlegg til omorganisering av pleie- og omsorg i Radøy er utarbeidd av ei arbeidsgruppe som kom med sin rapport 2. mai.
Arbeidsgruppa legg fram fire modellar for framtidig utbygging av institusjonsplassar. Alle modellane legg opp til at Hordabøheimen vert lagt ned.
Modell I har fått namnet Helsetun og legg opp til å riva gamle meieriet på Manger, flytta brannstasjonen samt lokalet og lageret til uteseksjonen. Vidare legg modellen opp til å byggja 60 institusjonsplassar og gjera gamle velferdssenteret om til leilegheiter for dei tyngste brukarane.
Ein modell med delvis utbygging av Helsetun legg opp til å riva gamle meieriet og byggja 40 institusjonsplassar.
Ein modell III legg opp til 12-14 nye institusjonsplassar og ein modell IV vil byggja 20 nye sjukeheimsplassar og gjera alle plassane ved Velferdssenteret om til bufellesskap.
Samfunnshelseplanen for 2002-2006 konkluderer med at Radøy har trong for 12-15 nye institusjonsplassar. Dette kjem i tillegg til eksisterande plassar ved Velferdssenteret og ved Hordabøheimen.
Dei to-tre siste åra har kommunen hatt ekstra stor trong for fleire institusjonsplassar. Dette har ført til at særleg Velferdssenteret i periodar har hatt relativt høgt overbelegg.
I åra frå 2005 til 20020 er det venta at talet på eldre over 80 år i Radøy går ned med 100 personar.