Vil leggja ned kreativ klasse

– Me er ein full klasse i eit nytt bygg med nytt utstyr, så dei har ikkje noko god grunn til å leggja ned denne klassen, seier Cecilie Iden Nilsen, elevtillitsvald i klassen.

– Me har også utruleg gode faglærarar. Me held på med 15 ulike ting i klasserommet, men læraren vår, Reidun, har styr på alt, seier Maren Bertelsen, varatillitsvald i same klasse.

Fylkesrådmannen vil leggja ned VG2 design og tekstil på Knarvik vidaregåande frå august 2012. Tilrådinga kjem fram i eit forslag som har vore ute på høyring før saka kjem opp i yrkesopplæringsnemnda i dag.

Få klarer fagbrevet
Fylkesrådmannen grunngjev tilrådinga med at VG2 Design og tekstil gir kompetanse til å søkje læreplass i Kjole- og draktsyarfaget og nokre få andre svært små lærefag.
Problemet, slik fylkesrådmannen ser det, er at det ikkje finst læreplassar i desse faga.

Fylkeskommunen har dei siste åra i staden måtta oppretta VG3 tilbod i skule for elevane på linja. Svært få av dei elevane som har gått VG3 i skole har klart å bestå fagprøva.

Fylkesrådmannen skriv i grunngjevinga at dei heller ønskjer at elevane finn ei anna utdanning innanfor estetiske fag som gir ein reell yrkeskompetanse.

Målretta elevar
– Det stemmer at mange stryk når dei skal opp til sveineprøva, men hovudårsaka er at elevane per i dag berre har eitt år på å førebu seg til sveineprøva. Det er for lite. Me treng meir erfaring i faget før me tar prøva. Ved Sam Eyde videregående skule i Arendal har dei forstått dette, og gir elevane to år med undervisning i saum før fagprøva. Dei kunne heller hjelpt elevane til å bestå på denne måten, seier Nilsen.

Reidun Langesæter er kontaktlærar og faglærar for VG2 design og tekstil på Knarvik vidaregåande. Ho er einig i det elevane oppgir som grunn for den høge strykprosenten.

Meir praktisk
– Kunnskapsløftet som har komme inn i vidaregåande skule gjer at elevane har veldig lite saum første året. Det er få læreplassar, fordi bedrifter vil ikkje ta imot elevane fordi dei kan for lite. Det er ikkje rett å berre gje elevane 10 månaders praktisk undervising. Fagprøva går på saumkunnskap og tid. Når dei ikkje har nok erfaring, klarer dei ikkje verta ferdige innan tida, sjølv om dei har saumkunnskapen, seier Langesæter.

Når elevane hennar tek fagprøva har dei berre hatt halvparten av den praktiske undervisinga faglæraren hadde då ho tok prøva i si tid.

– Det er ikkje elevane det er noko gale med, seier faglærar Langesæter.

– Eg synest dei skal gi elevane eit skikkeleg undervisingstilbod, i staden for å motarbeida dei med å foreslå nedlegging år etter år. Når dei driv på slik, er det er nett som om yrket vårt ikkje er verdt noko, seier ho.

Tru på norsk design
Oleana, Janus og Dale er tekstilverksemder som gjer det bra i Hordaland, og elevane ved linja er optimistiske når det gjeld jobb.

– Marknaden for nordisk design er stor, og mange skandinaviske merke har gjort det bra dei siste åra. Berre sjå på Moods of Norway, seier elev Cecilie Iden Nilsen, som vil verta klesdesignar.

– Det er skremmande å vera elev på ei linje der halvparten stryk, men me som går her veit kva me vil. Om me må flytta til Arendal eller København for å verta ferdige, så gjer me det.

Men det er synd om elevar må flytta heimefrå tidlegare når det er nok elevar som er interesserte i faget her i Knarvik, seier Nilsen.

Ho hadde sjølv flytta til Bergen etter VG1 om Knarvik vidaregåande ikkje hadde hatt VG2 Design og tekstil.