Vil samla lokale foto på internett

? I dag er Internett startplassen for all informasjonshenting, seier Øystein Rolandsen, salssjef i verksemda Digitroll.no.
Spreidd hjå kommunane, bygdeboknemnder, organisasjonar og private i Nordhordland er det i dag eit omfattande historisk biletmateriale. Ideen til Rolandsen i Digitroll og Jan Helge Soltvedt i Soltvedt Scanner Studio er å samla dette saman for skanning, og deretter gjera det tilgjengeleg under ein eigen nettportal. Adressa nordhordlandsbilder.no har Digitroll alt i dag fått registrert på seg, dersom portalen skulle verta noko av.
? Me ynskjer å samla desse bileta, ta vare på dei og presentera dei. Det handlar om å gjera dette tilgjengeleg for publikum, seier Rolandsen.
Soltvedt Scanner Studio skal etter ideen stå for skanning av gamle papirbilete som vert henta inn.

Få med seg
Torsdag i førre veke presenterte Rolandsen og Soltvedt ideen sin for eit knippe representantar for kommunar og bygdebokinteresserte i Nordhordland. Det eventuelle neste steget er at dei enkelte kommunane tek ideen opp til handsaming, og seier ja eller nei til å bruka pengar på prosjektet.
? Me kan ha ei nettløysing klar til august, dersom det er oss i Digitroll.no det står på, seier Rolandsen.
? Men me har ikkje ressursar til å laga ein ferdig portal utan at me er sikre på å få noko innhald, la han til, og signaliserte at kring fem av åtte kommunar måtte vera med for at Digitroll skulle starta arbeidet.
Kommunane Rolandsen vil ha med i portalen er Austrheim, Fedje, Lindås, Masfjorden, Meland, Modalen, Osterøy og Radøy.

Startavgift
Den største utgifta for kommunane dersom ein ynskjer å samla bileta og skanna dei, vert sannsynlegvis dei ressursane som må brukast til innhenting. Arvid Skogseth har nyleg skrive bygdebøker for Fedje, og han sa på møtet at det er særleg viktig å få inn så mykje opplysningar som mogleg, når ein er heime hjå folk og hentar bilete som skal til skanning. Erfaringa frå Austrheim er vidare at ein må heim til folk for å få inn slike gamle bilete, det er ikkje tilstrekkeleg å opplysa om at bilete kan leverast inn til kommune, bibliotek eller liknande.
Rolandsen i Digitroll signaliserte at kvar kommune må ut med 15.000 kroner i ei startavgift for å vera med i portalen, og i tillegg kjem det så ei årleg avgift for å dekka serverleige.

Gratis i 10 x 15
Ein nettportal skal med hjelp av vide søkekriterium gjera alle bileta lett tilgjengeleg. For dei som så finn bilete dei er interesserte i, vert det mogleg å lasta dei ned gratis i ein storleik på kring 10x15 cm.
? Slik vert det mogleg for til dømes skuleelevar å bruka bileta gratis i særoppgåver og anna, seier Jan Helge Soltvedt frå Soltvedt Scanner Studio.
Dersom ein ynskjer større format skal det vera mogleg å bestilla dette direkte frå portalen. Brukarane må då bestilla papirbilete frå Soltvedt Scanner Studio.