Vil sikra ubåten i 2007

I sommar skal Kystverket undersøka vraket nærare. Helst ønskjer dei å ta seg inn i ubåten for å kartleggja tilstanden til vraket. Kystverket vil og prøva å finna ut meir om kor stort område som er forureina av kvikksølv frå ubåten. Dette arbeidet er kostnadsrekna til kring 31 millionar kroner.

Kystverket reknar ikkje med å få gjort meir enn dette i år, mellom anna av di arbeidet er avhengig av godt ver. Men målet er å sikra ubåten permanent i 2007. Då er det tre alternativ:

1: Å henta opp det dei måtte finna av forureinande element frå ubåten, og dekkja til resten.

2: Å heva den delen av vraket der kvikksølv-flaskene er lagra.

3: Å ikkje heva noko, men dekkja til heile området.

Kystverket vil ikkje gå ut med kor mykje dei reknar med at dette vil kosta, av di arbeidet skal leggjast ut på anbod. Men det er etter alt å døma tale om fleire hundre millionar kroner.

Den tyske ubåten U864 vart seinka utanfor Fedje under andre verdskrigen. Ubåten var truleg lasta med opp mot 70 tonn kvikksølv.