Waldegruppen med lågaste Vestbygd-pris

Det framgår av an­bods­utlysinga at låg­aste pris ikkje er det einaste avgjerande punktet. Men sjølv om Meland kommune eventuelt skulle velja andre til jobben enn Waldegruppen, er det likevel rom for å klara jobben innanfor ramma.

I anbodsutlysinga er det antyda ein verdi på jobben på mellom åtte og ti millionar kroner, og med eitt unntak er alle fem tilbydarar innanfor på begge dei to utbyggingsalternativa. Kommunen har vedteke ei finansieringsramme er på 12,2 millionar, for komplett anlegg.

5-6 klasserom
Kommunen har bedt om pris på to alternativ for skulen, som ligg i Holmefeltet. I alternativ 1 er det fem små klasserom på 40 kvadratmeter kvar. Dette er tenkt slik at ein kan slå klasseromma saman to og to, og få to store klasserom på 80 kvadratmeter, og eit klasserom på 40 kvadrat­meter.

– I tillegg er det to grupperom, samt tilbygg for lærararbeidsplassar med 50 kvadratmeter. Det er og med teknisk rom på kring 50 kvadratmeter, og reinhaldsrom på 15 kvadrat­meter, samt gangareal, opplyser prosjektansvarleg Jens Bjordal i Meland kommune. 

– I alternativ 2 ligg det inne ytterlegare eitt klasserom, på førti kvadratmeter.

Rask byggestart
Utbygginga av Vestbygd skule skal opp til godkjenning i kommunestyret 8. februar, og deretter skal ting etter planen skje raskt.

– Eg håpar me kan få til byggestart så raskt som mogleg, og at ein kan vera klar med tilbygget ikkje så lenge etter skulestart 2012/2013, seier Meland-ordførar Nils Marton Aadland (H).

– Det har vore stort press på denne skulen over lang tid, no byggjer me for mange år framover, seier Aadland.

Anboda:

Anboda som er komne inn på tilbygget til Vestbygd skule.
(Dette er hovudtal frå anbodsprotokollen, som ikkje er
kontrollerte eller bearbeidde). (Alle tal er utan moms).

Rangerte med rimelegaste øvst:
1    Waldegruppen    
1.)    8.296.521
2.)    8.707.569

2    Østerhus
1.)    8.680.000
2.)    9.272.000

3    Malthus
1.)    8.658.000
2.)    9.727.000

4    Nordhordland Grunn og Betong        
1.)    9.000.000
2.)    9.450.000

5    Nævdal Yrkesbygg
1.)    9.905.997
2.)    10.455.997