Which Witch til Håkonshaugen

Dette vert første framsyninga her i landet på norsk, og teksten vert omsett frå engelsk til nynorsk. Produksjonen vert den største nokon gong i Nordhordland og har eit budsjett på nær fire millionar kroner.
Fleire av dei ni profesjonelle solistane er alt på plass, medan nokre framleis manglar. Arrangørane vil ikkje ut med namn enno. Men ingen av komponistane, Benedicte Adrian og Ingrid Bjørnov, vil vera å finna i hovudrollane. Det er snakk om ni framsyningar i tidsrommet 26. juli til 5. august. Musikalen vil gå på kvelden, og vil verta eit fantastisk syn med flotte kulissar, lys, faklar, kostymer og ikkje minst mektig musikk, meiner Vatnøy.

Full sceneversjon
Benedicte Adrian og Ingrid Bjørnov starta arbeidet med musikken til Which Witch i 1986. Prosjektet vart til i samarbeid med Ole Anders Sørli. Konsertversjonen hadde premiere i Bergen i 1987, og har vorte framført over 200 gongar i ei rekke land. No kjem altså turen til Nordhordland.
Men arrangørane, Leif-Egil Vatnøy og Linda Fosse, nøyar seg ikkje berre med konsertversjonen. Dei vil setja opp ein full sceneversjon, som tidlegare berre har vore framført i Noreg på engelsk. Det var denne versjonen som Adrian og Bjørnov sette opp på West End i London. Men teksten vert altså omsette til nynorsk, og oppsetjinga vil ikkje verta nokon kopi av West End-versjonen.
? Då me fekk ideen vurderte me mellom anna Håkonshallen som lokalitet for førestillinga. Men me ville gjerne leggja prosjektet til Nordhordland, seier Linda Fosse.
? På grunn av dei gode erfaringane frå Håkonarspelet, innhaldet i stykket og at eg er sjølv kjem frå Seim, var det naturleg for meg å ønskja at musikalen skulle framførast her på Håkonshaugen, legg Vatnøy til.

Gigantisk framsyning
Dette vert ei gigantisk framsyning, med mellom 70 og 100 menneske på scena når ein reknar med både skodespelarar, songarar og orkester.
? Å skaffa nok gode blåsarar bør ikkje verta eit problem i eit distrikt som vårt. Strykarar må me nok til Bergen for å henta. Me treng og gode rockemusikarar, seier Vatnøy. Dei har dessutan avtale med ein kapellmeister, men vil førebels ikkje ut med namnet. Dei vil heller ikkje ut med namnet på aktuelle regissørar.
Men dei seier det alt etablert eit samarbeid med Hordaland Teater om prosjektet. I tillegg til dei ni solistane, trengst det rundt 30 koristar/dansarar til framsyninga også. Det vert audition til desse rollene like over nyttår.
? Eg håpar at folk frå regionen melder seg på denne auditionen, seier Vatnøy.  Men han trur at konkurransen kan verta hard om desse rollene også, og veit frå liknande oppsetjingar at folk har kome på audition frå heile landet og utlandet med. Sjølve prøvetida vert på ein månad, med øving frå klokka 10 til 22 kvar dag. Heile sommaren vil difor gå med for ensemblet når ein reknar med prøvetida og dei ni framsyningane.
Arrangørane har knytt til seg ei rekke samarbeidspartnarar for å få dette til. Nordhordland Reiselivslag er ein av desse.
? Eg har lenge drøymd om å få ei slik storsatsing til Nordhordland, og vart difor svært begeistra då Vatnøy og Fosse kom med dette prosjektet, seier reiselivssjef Anne Marie Reistad. Dei kjem til å laga til turistpakkar rundt arrangmenetet, som inneheld både framsyninga, overnatting og andre tilbod. Prosjektet skal også ha tre hovudsponsorar. To av desse er Lindås kommune og BKK. Den tredje er så godt som på plass, seier Vatnøy.
? Utan den velviljen som er vist av sponsorar og andre, hadde ikkje dette vore mogleg å få til, seier han.