William overkøyrt av traktor

? Det er heilt uforståeleg at han kom uskada frå det, og eg var sikker på at eg kom til å mista han, seier faren.
Det var fredag ettermiddag det skjedde. Glenn og sønene Kjartan og William var på treningshelg i Gaular for å lada opp til årets store flugefiskekonkurranse komande helg.
? Me stod i Sande sentrum og heldt på å gjera oss klare til å gå ned til elva då det kom ein traktor bortover vegen. Men den hadde god plass til å passera, så det var ingen fare med det, seier Glenn. Han fortel at for å vera på den sikre sida, trykte William seg likevel inntil bilen i det traktoren kom nærmare. Men mannen som kjørte traktoren må ha feilberekna kor brei traktoren var med tvillinghjul, og svinga ikkje til sides trass i at det var god plass på andre sida. Dermed vart William dradd med hjulet fleire meter framover og forsvann under både med kropp og hovud, fortel faren.
? Då traktoren tok til å klatra oppover føtene hans ropa han nei, nei, nei, før han svima av og forsvann under hjulet! seier faren. Etter det hugsar ikkje William nokon ting før slo opp augo heilt fortumla nokre minutt seinare og spurde: Dør eg no pappa?
? Det var rett og slett grusomt, seier faren.

Bortimot uskadd
Om William tilsynelatande såg bortimot uskada ut, vart han send til Førde sjukehus med luftambulanse. Glenn og Kjartan kjørte etter i bil.  Av synlege skadar hadde William skrubbsår på kinnene og var litt mørbanka her og der, men elles såg alt bra ut. På sjukehuset var dei overraska over god form han var i, men ville han skulle vera der over natta til sjekk.
Laurdag kom også mamma May Karin Aase. Ho var på jobb i Nordsjøen og skulle eigentlig ikkje heim før no onsdag.

Tilbake til sjukehuset
Etter at William vart utskriven frå sjukehuset laurdag, drog han rett tilbake til Gaularelva for å fiska. Men trass i at grunneigaren gav han den beste fiskeplassen i heile elva, var han mykje rolegare enn han plar vera. Ja, rett og slett litt utafor, forklarer faren, som naturlegvis vart bekymra. Det same vart grunneigaren, som heldigvis kjende ein av legane på Førde sjukehus, og fekk ordna det slik at William fekk koma inn att. Det var nemleg ein viss fare for hjerneblødning, hadde legen sagt.

Heim att søndag
Men søndag fekk William reisa heim, og måndag var han på plass på Sæbø skule.
? Han var betre i dag enn søndag, så det går nok gradvis over. Men me skal likevel til legesjekk i dag klokka tolv for å vera på den sikre sida, seier Glenn.
Han trur at mykje av grunnen til at det gjekk så bra, er at William driv med fleire fysiske aktivitetar som kulekast, sleggekast, flugefiske og fotball.
? Eg trur det har gjort kroppen hans sterk og ledig, seier Glenn. No lyt William stå over gymmen og fotballen i tre veker, men det går nok bra.
Då William var tilbake ved Gaular laurdag kom også den eldre mannen som hadde kjørt over han på besøk. Han vart fråtatt førarkortet på staden og kjem nok aldri til å få kjøra traktor meir.
? Mannen var fryktlege lei seg, seier Glenn.

Tilbake til helga
Til helga skal William og familien tilbake til Gaular ? til Gaularmarknaden og den store fiskekonkurransen.
? Det blir bra å få tankane over på andre ting. Men me må jo også snakka om det. For min del har eg sett og høyrt alt i reprise inne i hovudet mitt kvar kveld, og det har nok ikkje gått mindre inn på dei andre, seier pappa Glenn som er sjeleglad over at det gjekk så bra.
? Du kan godt ta med at fiskemiljøet kring Gaularelva er heilt fantastisk og at dei stilte opp for oss hundre prosent, legg William til.