Classic XI vann romjulscupen

Classic XI vann først pulja si, og gjekk deretter vidare til å vinna heile turneringa. Sentrale på laget var to blad Møvik, Kristoffer og Matias.
– Når me først er med, så er me med for å vinna, seier Matias Møvik, og legg til:
– Og så fekk me litt trim i jula.
Han skåra eitt av måla i finalen, og likte seg på cup.
– Ekstra gøy var det å vinna.

Matias til Fana IL
Kristoffer Møvik har kontrakt med Brann, medan storebror Matias skal spela i andredivisjon for Fana neste sesong. Han signerte for 2. divisjonslaget mån­dag 26. desember, etter å ha spelt for Løv-Ham i førstedivisjon denne sesongen. Målet for Matias er å komma tilbake til eliteserien.
– Eg har jo sjølvsagt lyst å spela på det nivået, det har jo alle. Men no skal eg begynna i 2. divisjon, prøva å spele fast der og få litt sjølvtillit. Eg har ikkje noko spesielt anna mål enn det. Eg tar det som det kjem, seier den tidlegare Eikanger-, Brann- og Løv-Ham-spelaren.
Fana rykka opp til 2. divisjon i haust, etter at dei i 2010 rykka ned frå andre til tredje.

Femten lag
15 lag møtte opp i Nordhordlandshallen for å spela i NBK sin romjulscup tysdag 27. desember. Ni lag var med klassen for dei aktive, medan seks lag var med i mosjonsklassen med spelarar i 6. divisjon og nedover.

Det har ikkje har vore rom­juls­cup sidan 2006, men no er NBK i gang igjen med tur­ner­inga.

– Me såg at det mangla ei turnering for seniorane. Som tidlegare er det A-laget vårt som lagar til. Dei er dommarar, står i kiosken, og ryddar opp, seier turneringsleiar Harald Kvamme.

– Turneringa har gått fint, utan alvorlege skader,

Med 15 lag påmeldt synest han det var heilt grei oppslutnad.

– Påmeldinga gjekk greitt, via nettet. Me kunne kanskje ha annonsert litt meir, men elles var cupen ein suksess.

Vinnarane, og dei som tok 2. plass og 3. plass, fekk medaljar. Vinnarane fekk kinderegg i tillegg.

– Me fann ut dette med turneringa litt seint, så det vart ikkje pokalar i år. Me får ordna det neste år, om det vert cup igjen.