Einaste frå norom brunæ på Salhuslaget

Som einaste jente frå nordsida av brua, spelar Birte Skurtveit Davidsen på handballaget til Salhus. Laget prøver å rekruttera fleire jenter frå kommunane i Nordhordland. Dei vil gje eit godt tilbod og auka nivået på handballen i distriktet. Davidsen trenar med både Salhus og Nordre Holsnøy.

– Forskjellen på dei to laga er at hos Salhus er det høgare tempo, betra forsvar, dei er flinkare å kontra, skyta og plassera ballen, det er mykje betre målvakttrening, og me spelar på høgare nivå. Eg vil anbefala andre å begynna her, seier Davidsen.

Det har ikkje tatt henne lang tid å oppdaga fordelane, etter­som ho berre har trent der to gongar til no. Ho veit ikkje enno om ho vil slutta i Nordre Holsnøy eller om ho vil halda fram i begge laga.

Hevar nivået
– Det er ikkje så mange handballag her ute. Det eg håpar på, er at me kan få større breidde i handballen. Hallen og anlegget her er fantastisk til dette høvet, synd at det ikkje er meir handballspeling her, seier Jan Freddy Johannessen, som er trenaren deira.

Salhus har høgare nivå enn lokallaga her ute. Johannessen har handballtrenarutdanning på nivå tre. Det er det høgste du kan få i regionen. I tillegg er han trenar på 1. divisjonslaget Bjørnar.

– Me har vore her i fem år, men me har hatt lite tilsig av spelarar opp gjennom åra. Me håpar at det skal endra seg. Dersom det er folk som vil trena på høgare nivå så må dei gjerne koma hit og sjå om dei trivst. Me trenar alltid her frå 16.30-18 på fredagar, seier Johannessen.

Samarbeid
– Tidlegare har Salhus og Nordre Holsnøy hatt eit samarbeid her ute. Dette var med 91-92 gruppa. No har me 96-gruppa, med ein person frå 97, seier Johannessen.

Jentene spelar både i A og B i aldersbestemte lag. A er høgaste nivået. Trond Egil Soltvedt er leiaren for Meland Aktiv. Han har gitt dei treningstid der i halvannen time om fredagane.

– Eg trur han ser betydinga av å ha handballag i hallen. Me har også eit samarbeid med Sprek og Blid for at jentene skal begynna å bruka treningssenter for å få betre styrke. Tine Samdal Olson, senterleiar og helsekonsulent på Sprek og Blid i Knarvik, har gitt oss gratis trening der. Alle i laget kan trena der gratis så mykje dei vil. Olson var også med på det førre prosjektet me hadde, seier Johannessen.

Enkel sak
Det er ikkje noko problem at jentene må reisa heilt til Frek­haug for å trena. Det er like langt dit som til hallen dei brukar i Arna på resten av treningane. Foreldra har sine køyrelister, så transporten går heilt fint.