Eit folkehav

– Totalt har me hatt 7000 deltakarar. Me har sett ny deltakarrekord med god margin. Ting har gått veldig bra og me er godt nøgde, slik oppsummerer Knarvikmil-general, Helge Brekke, ei travel veke.

Suveren vinnar
Strålande haustvêr kom som bestilt for arrangørane, og det var skikkeleg livleg på Knarvik stadion både laurdag og søndag.
Strilen hadde fotografar i løypene begge dagar. Alle rapporterte om blide deltakarar.
Randi Laupsa, Ragnhild Indrebø og Astrid Fosse kunne fortelja om ein flott tur i naturløypa, medan deltakarane på 10 km gjorde seg klare til start. Då startskotet gjekk tok det ikkje lange tida før Gitwa Assefa skaffa seg eit solid forsprang. Han vann 10 kilometeren like suverent som han vann halvmaraton dagen før. I dag stoppa klokka på 29.44. Kirsten Melkevik vart beste kvinne på same distanse med tida 34.51.

Jogga med vogn
Anita Klementsen Larsen frå Lindås tok seg litt betre tid på 5 kilometeren. Ho hadde ingen ambisjonar om siger og jogga jamt med Daniel (2) i vogn.
 – Det går ikkje så fort når du spring med vogn, men det var ei kjekk løype. Eg synest den var betre enn i fjor, seier ho i ein kommentar til Strilen. Møt fleire av deltakarane i Knarvikmila i avisa tysdag.