Færø-familien dominerte

5000 meter-løpet på bane gjekk søndag 25. september, på bana på Ostereidet.

Færø-familien tok dei fire første plassane i herreklassen. Brørne Halfdan Emil og Jo Harald kjempa om sigeren. Halfdan Emil, den yngste av dei to, var best i spurten og vann på 16.51,5. Jo Harald følgde 1,3 sekund etter.

Vinnartida til Halfdan Emil var langt over minuttet dårlegare enn i fjor. Det skuldast nok både at konkurransen i år ikkje var så hard, og at Halfdan Emil har slite med sjukdom store delar av sommaren. Men no er han på rett veg att.

Tredjeplassen i Eikangerløpet var det veteranen Einar Færø (f.1956) som tok, med 18.25,7. Han var hardast pressa av bror sin, Helge Færø, som fekk notert 18.31,0. Det var først på dei par siste rundane at Einar denne gongen viste seg sterkare enn dei fire år yngre broren.

På femteplass i herreklassen kom unge Lasse Nordahl (f. 1997) som debuterte i Eikangerløpet med fine 19.08,5.

Bertine Helene Færø (f. 1992) vann kvinneklassen med 19.09,4, ca. 18 sekund etter løpsrekorden ho sette i fjor.

Forholda ved Eikangerløpet i år var gode med opphaldsvêr, vindstille, fin temperatur og tørr bane. Deltakinga var med 15 startande om lag som i fjor.

Eikangerløpet vart i år skipa til for 32. gong på Ostereidet. Arvid Hauge har delteke i alle desse løpa.
Vinterkarusellen til Eikanger IL startar med første løpet på Eikanger laurdag 15. oktober.