Først ute med minicup

– Aldri før har det vore arrangert minicup i handball i vår region, og det er ei ære for Knarvik Idrettslag å vera først ute, seier Toyni Sæbø, som er leiar i Knarvik Idrettslag si handballgruppe.

Spelarane som møtest, er jenter frå årskulla 2002 og 2003, både frå arrangøren, andre lokale lag, og fleire lag frå Bergens-regionen.

Både Lindås, Nordre Holsnøy og Modalen stiller lag. Og frå sørsida kjem det lag blant anna frå Bjarg, Fana, Salhus, Flaktveit, Kringlebotn, Bønes, Sædalen, Lysekloster og Sotra.

– Så unge spelarar har ingen serie. Då vert miniturneringane den måt­en dei får skaffa seg kamp­trening på, opplyser Åshild Træland i handballgruppa til Knarvik.

Og sjølv om det heiter minicup, er dette eit stor arrangement for handballgruppa å dra i hamn. Eit arrangement som og vil gje ei god inntekt.

Træland seier at gruppa har fått spørsmål om å arrangera ei slik turnering tidlegare, og at dei no berre bestemte seg for «å hoppa i det».
– Me stiller med eigne spelarar frå damelaget som dommarar i dei kring 40 kampane. Og mange foreldre til spelarane på laga våre stiller opp på dugnad i kiosk, sekretariat og som vaktar, opplyser Trædal.

I mars skal Lindås si handballgruppe arrangera ein tilsvarande cup i den nye hallen der.