Første tap for ENK

Men ingen i ENK kan vera for skuffa etter tapet. Follese rykte ned frå 2. divisjon i fjor og er nok eit av dei sterkaste laga i divisjonen.

– Jamt over var Follese eit godt lag, seier ENK-trenar Marius Silseth.

– Dei har meir rutine, og større fysikk enn det me har, legg ENK-trenaren til.

Kjempa tappert
For dei svartkledde opna bra på kunstgraset i Knarvik søndag. Den notoriske målscoraren Jannike Garberg laga første scoringa i kampen. Linda Helgesen slo eit høgt innlegg som Birthe Ann Larsen heada vidare til Garberg. 20-åringen var kald og roleg då ho sette inn 1-0 til heimelaget si store begeistring. Follese utlikna midtvegs i omgangen, og det stod 1-1 til pause.

Tøffe duellar
Det vart ingen lett kamp for ENK. Det fysisk sterke bortelaget var uvand kost for samarbeidslaget. Det small i kvar einaste duell, og ENK kjempa tappert og trekte seg aldri.

Då det var spelt 88. minutt kom baklengsmål nummer to og ENK klarte diverre ikkje å stå løpet ut. På overtid la Follese på til 3-1 og alt håp om poeng vart då lagt dødt. Det første tapet for ENK denne sesongen var eit faktum.

God start
ENK-trenar Marius Silseth tykkjer det var kjedeleg med eit tap i sluttminuttane, men var ikkje for nedtrykt etter tapet.

– Me ser ikkje svart på dette, seier Silseth og legg til:

– Eg hadde vore veldig nøgd med eit poeng. ENK har sju poeng på fire kampar og er for alvor med i toppen av 3. divisjon.

– Me er nøgde med starten, seier Silseth til slutt.