Held fram i Førde

Det vert ingen overgang til Sandefjord for den tidlegare Brann og NBK-spelaren Thor Jørgen Spurkeland. Spurkeland var på prøvespel i tippeligaklubben for nokre månader sidan og imponerte.

Tar ikkje sjansar
Økonomien i norsk fotball er stram og Sandefjord har ikkje råd til å ta sjansar. Det er hovudårsaka til at det ikkje vert nokon overgang.
– Dei vil henta ungt, men dei er nøydde til å vera heilt sikre på at spelaren forsterkar laget. Dei har ikkje råd til feilgrep, seier Spurkeland til Strilen.
Trass dette er Spurkeland storfornøgd med tilbakemeldingane han har fått frå Sandefjord-trenar Patrick Walker.
– Dei var imponerte og vil følgja meg tett, er tilbakemeldingane Spurkeland har fått.

Innstilt på Førde
Walker har gitt signal om at han vil ha Spurkeland med på prøvespel over lengre tid. Det er uvisst om dette lar seg gjera.
– Me byrja oppkøyringa på måndag og eg veit ikkje om det er ideelt med prøvespel midt i oppkøyringa, seier Spurkeland som spelar fast i Førde.
– Eg stortrivst i Førde, med mange vener i klubben og med styret. Heilt suverent, seier midtbanespelaren.
Førde rykka opp til 2.divisjon og kjem til å spela mot lag som Åsane, Os, Nest Sotra og Fana. Spurkeland trur Førde kjem til å overleva éin divisjon opp.
– Eg trur me kan overraska, men me er jo eit nyopprykka lag så om lag midt på tabellen bør vere ei realistisk målsetning, meiner Spurkeland.

Har ambisjonar
Spurkeland seier at han har lagt Sandefjord på is for denne gong, men at han ønskjer å spela på høgare nivå.
– Eg trener elleve gongar i veka, seier Spurkeland og understrekar at målet sjølvsagt er å bli best muleg og å spela på eit så høgt nivå som muleg.
– Eg må jobba vidare, så vil eg lukkast til slutt, seier Spurkeland som er ved godt mot.
Spurkeland var én av unggutane som ikkje fekk sjansen då han var i Brann. Det same var Erik Mjelde.

Kaptein
I dag er Mjelde kaptein på Sandefjord og scora fleire mål i Tippeligaen i fjor, blant anna mot Brann.
Spurkeland hadde litt kontakt med Mjelde under tida i Brann, og snakka ein god del med kapteinen under det korte opphaldet i Sandefjord.
– Han er ein eg ser opp til, og han har gått den lange vegen, seier Spurkeland, som no altså gjer seg klar for 2. divisjonsfotball med Førde.