Idrettslaga har flest Grasrot-medlemmer

Det viser statistikk som IL Avidra har sett opp.
Etter to månader i 2010 har desse ti idrettslaga notert vel 135.000 kroner frå Norsk Tipping. Dei ti laga har fått over 90 nye registrerte spelarar så langt i år.

Alvidra på topp
Statistikken viser no IL Alvidra på topp både i medlemer og kroner, deretter Austrheim Idrettslag og Nordre Holsnøy IL.

– Me er nøgde så langt med 23 nye Grasrot-medlemer etter to månader av 2010, seier Magnar Halås i Alvidra.

Halås fører statistikk for Alvidra, og har også oversikta over andre lokale lag.

– Får me sju nye i snitt per månad resten av året, passerer me 500 medlemer, som er målet for 2010.

I Lindås kommune ser det no ut til at kring halvparten av spelarane har registrert sine kort. Det er over landsgjennomsnittet.

Per nyttår var det 520.000 av 1,9 millionar spelarkort på landsbasis som var registrerte med grasrotandel. Norsk Tipping ser sjølv for seg ein auke på 20 prosent i løpet av det andre året med Grasrotandelen.

– Hugs at det ikkje kostar noko å registrera spelarkortet. Og då let du Norsk Tipping senda fem prosent av speleinnsatsen tilbake til eit favorittlag.

Dette påverkar korkje innsats eller gevinst. For dei som ikkje har grasrotandel på kortet sitt, går denne femprosenten til Norsk Tipping sin felles pott.

– Så midlane er ei form for kulturmidlar, betalt av Norsk Tipping sitt overskot, minner Halås om.

– Registreringa er fort gjort å ordna når du brukar kortet hjå kommisjonæren.

Idrettshall
For Alvidra sin del er det diskutert å setja grasrotpengane på fond, slik at dei er sette av som eigenkapital til ei mulig storstove/idrettshall for Alversund.

Pengane frå Norsk Tipping vert overførte til laga tre gonger i løpet av året. Du kan lesa meir på grasrotandelen.no