Iskaldt NM

– Det er andre gong me arrangerer NM i harpunskyting. Det er mange i Noreg som driv med undervass­jakt, men det har aldri før blitt målt kor presist folk skyt. Derfor arrangerte me dette for første gong i fjor, og skal no gjera det til ein årleg tradisjon, seier initiativtakar Børje Møster.

Det var 20 lokale deltakarar påmeldt, og sjølv med lita startliste er det offisielt NM, og vinnaren kan kalla seg noregsmeister i harpunskyting.

Mange omsyn
Børje Møster har i mange år drive med undervassjakt, og seier det er mange ting å tenkja på for NM-deltakarane.

– Det er mange faktorar som spelar inn. Straum, motstand i sjøen og avstand til blink er ting ein må tenka på, seier Møster.

Blinkane er plasserte på fire meters djupn, og avstanden ­del­takarane skyt frå er fem meter for seniorar og fire for juniorar.

Denne gongen var det berre lokale deltakarar med, men målet er å få med undervassjegerar frå heile Noreg.

– Me har lyst å arrangera meisterskapen under havsportveka i framtida, seier Møster.

– Treng djupt basseng
Årets NM vart arrangert i sjøen, men i framtida vil dei også arrangera det i basseng. Men slik situasjonen er no, er det ingen skikkeleg djupe basseng i Nord­hordland.

– Nordhordland treng eit djupt basseng. Det kan brukast både til stup, undervassrugby og kurs i fridykking. No har me brukt bassenget i Radøyhallen, og ein får gjort ein del øvingar der. Men det er litt for grunt til ein del ting, seier Møster.

Siger i debuten
Johan Kveldstad (15) gikk til topps i juniorklassen i NM, og første gong han skaut med harpun var under NM. At han var einaste deltakar i klassen vil ikkje historiebøkene seia noko om.

– Eg har drive med fridykking sidan i sommar, og no var første gong eg skaut med harpun. Det gjekk mykje betre enn eg hadde forventa, seier Kveldstad.

Harpunskytinga gav meirsmak og no skal han sjølv kjøpa harpun og driva med undervassjakt. Han stortrivst med fridykkinga, men det er ikkje mange på hans alder som driv med det.

– Eg trur det er fordi det kan sjå litt keisamt ut. Eg synest ikkje det såg så kjekt ut med fridykking før eg prøvde sjølv, men no er det kjempekjekt. Eg vil anbefala alle å prøva det ut, seier Kveldstad.