Motet på topp i Eikanger

– Me møter eit godt lag. Dei ligg på andreplass i divisjonen vår. Då må det vera full tenning dersom me skal klare å vinna, sa trenaren til Eikanger, Kjell Øyvind Nævdal.

Han hadde strategien klar og brukte pausen godt då Eikanger møtte Nordre Fjell på Ostereidet. Ved pause var stillinga 0−1 til Nordre Fjell.

Eikanger-trenaren nytta pausen til å diskutera strategi og få opp «gøtsen» i laget. Det lukkast.

Då pausen var over slo Eikanger til med det same. Ørjan Ånensen sette ballen i nettet og deretter gjekk det slag i slag. Ei lita stund seinare var stillinga 3−1 til heimelaget. Det vart også sluttresultatet.

– Me ligg langt nede sjølv. No har me fått tre nye, gode spelarar. Då hevar dei andre seg òg. Det vert meir konkurranse mellom spelarane, seier Kjell Øyvind Nævdal.

Etter mange tap på våren, vart spelarane litt motlause, meiner trenaren. Med nye spelarar i stallen og betre plassering på tabellen, er det optimisme i laget.

– Motet har vore på topp dei siste treningane, og nivået og oppmøtet er bra, får Strilen vita.

Laget håpar at denne utviklinga vil halda fram no.