Nedrykksprega sesongavslutning

På kvinnesida er det klart for nedrykk for Hordabø. Laget hamna på sisteplass i 2. divisjon kvinner avdeling 4, og er klare for spel i 3. divisjon i 2012.
I 4. divisjon starta tre lokale lag sesongen i vår, men etter at Lindås trekte seg i sommar var Eikanger/NBK/Kvernbit (ENK) og Radøy/Manger aleine att om å avslutta sesongen. ENK er midt på tabellen når ein serierunde står att, Radøy/Manger er sist. Sidan dette er lågaste nivå på kvinnesida, vert begge å finna i same divisjon i 2012.

Radøy i kvalik
Radøy/Manger sin sterke haustsesong i 4. divisjon menn avdeling 1 er det einaste positive ein kan finna i årets lokalfotball. Med ein serierunde att er dei klare for kvalifiseringsspel om opprykk til 3. divisjon. Første kampen går laurdag 29. oktober på Manger, returkampen er ikkje sett opp.

– Utgangspunktet var helga etterpå, men det vil me unngå sidan det er cupfinalehelga, seier Torstein Pedersen, konsulent hjå Hordaland fotballkrins.
Radøy/Manger skal spela kvalik mot Sandviken eller Hovding, frå 4. divisjon menn avdeling 2. Nettopp desse laga møter kvarandre neste helg, der vinnaren får kvalik.

NBK er relativt trygge med sin åttandeplass ein serierunde før slutt. Niandeplassen kan gje nedrykk, men skal NBK verta passerte av Gneist må dette laget både knipa inn NBK sine tre poeng, og ein betydeleg målforskjell, opplyser Pedersen.

Ned frå femte
Kvernbit spelar i 5. divisjon menn avdeling 1, her har dei hamna sist og rykker ned. Eikanger og Austrheim enda som nummer 10 og 11 i 5. divisjon menn avdeling 3, og ligg an til nedrykk også dei.

– I 5. divisjon er det i utgangspunktet det siste laget som skal ned frå kvar av dei tre avdelingane, pluss det dårlegaste av dei som er nest sist. Men i tillegg kjem det sannsynlegvis ned tre lag frå 3. divisjon, og dette gjer at dei to siste skal ned pluss det dårlegaste av dei som er tredje sist, seier Pedersen.

Laga i Eikanger si avdeling har spelt to færre kampar, sidan Floppen trekte laget sitt. Poenga må såleis reknast om i høve til dei andre avdelingane, utan at dette utgjer nok til å berga laget frå Ostereidet.

– Eikanger ser ut til å verta det sjuande laget som rykker ned, seier Pedersen, som likevel kan lokka med eit lite håp.

– Dersom eit lag skulle trekka seg, er det Eikanger som først vil få tilbodet om å stå i 5. divisjon.

Midt på
I 6. divisjon menn avdeling 3 vart Hordabø nummer fem, Nordre Holsnøy nummer seks og NBK 2 nummer åtte. Pedseren reknar med at det betyr spel i same divisjon i 2012 for alle tre.

I 7. divisjon menn avdeling 4 har Gulen og Masfjorden plassert seg midt på, utanfor rekkevidde for opprykk. Fedje er heilt sist, men sidan dette er lågaste nivå rykker ikkje laget ned.

– Kring 10. desember er det påmeldingsfrist for 2012, og så reknar me med å ha avdelingsoppsettet for neste sesong klart før jul, seier Torstein Pedersen.