Overraska i Shetland Race

– Det var artig. Me sjokkerte nok litt, seier Terje Sætre frå Bakka i Austrheim. Han stilte i Shetland Race med båten Amante, også den heimehøyrande i Austrheim.

– Det er ein Mørebas på 33 fot. Det er ikkje så mykje. Vanlegvis er det dei store båtane som klarar seg best i Shetland Race.

– Måtte tenkja taktisk
Amante sigla med eit mannskap på fire, og brukte 43 timar og 50 minutt på turen frå Shetland til Bergen. Shetland Race går tur retur Shetland. Det var på siste  stykke frå Leirvik til Bergen at Amante overraska.

– Det var lite vind på returen frå Shetland, så det vart eit «lureløp». Det var nesten vindstille. Me måtte tenkja veldig taktisk. Det var nok også det som gjorde at ein liten båt gjorde det så bra, seier Sætre.

Han har drive med segling i mange år, og var med  for åttande gong. Amante er i utgangspunktet den treigaste av båtane i racet, difor smakte det ekstra godt å slå favoritten Rolf Hermansen og mannskapet hans. Men samanlagt var det Hermansen som stakk av med sigeren for niande gong.

– Tøffaste turen
Leiar i Nordhordland seglforening, Harald Matland, var også godt nøgd med racet.

– I at var det 37 båtar med. Fem av desse var lokale. Nordhordland seglklubb var blant dei som stilte flest båtar, seier han.

Nordsjøen er ofte lunefull og seglarane fekk ein spennande tur.

– Første del av racet var tøft. Me fekk stiv kuling rett i mot, så alle var heilt utslitne då dei kom fram til Shetland. Eg har vore med sju gongar. Turen bort er den tøffaste eg har vore med på. Heimatt derimot, var det lite vind, så det vart ei tolmodigheitsprøve. Mange båtar braut undervegs, men alle båtane frå Nordhordland seglklubb gjennomførte og fekk premiar i sine klassar.

– Aukande interesse
Med god bør brukar båtane i Shetland Race 27-28 timar på turen over Nordsjøen.

– Når båtane bruker over 40 timar, seier det sitt om forholda. Men det var ei flott oppleving uansett, seier Matland, som kan fortelja at interessa for segling er aukande.

– Det er mange som har fått augo opp for segling, og me ser at fleire og fleire kjøper seg båt. Dei fleste bruker båtane til mindre turar og deltek ikkje konkurransar. Seglbåtmiljøet er veldig positivt og det er kjekt å sjå at folk trivst på sjøen, får Strilen vita.