Padleklubben kan få Inkluderingsprisen

Hordaland idrettskrets har nominert Nordhordland padleklubb v/ Audun Håland til inkluderingsprisen 2011. Dei har nominert padleklubben fordi dei har eit uttalt mål om å bli nummer ein på inkludering, og viser det gjennom handling.

I vår gjennomførte Nordhordland padleklubb (NHP) eit eige padlekurs for utviklingshemma og deira støttekontaktar.

– Grunnkurset i havkajakk gjekk over åtte søndagar med totalt 16 timar. «Friskus-prosjektet» samla deltakarar frå fleire kommunar i Nordhordland, og hadde som mål å gje klubben kompetanse til å ta imot personar med utviklingshem­ming på klubben sine ordinære aktivitetar, heiter det i eit no­mi­nasjonsbrevet idrettskret­sen har forfatta.

Minister
Friskus-padlinga var svært vel­lukka og klubben har også oppretta eit eiga arbeidsutval for Friskusar og eit verv som inkluderingsminister, som Audun Håland fyller. Vervet er oppretta fordi klubben har tatt eit aktivt standpunkt for inkludering.

I nominasjonen skriv idrettskretsen at klubben gjer sitt yt­tar­ste for at ulike grupper får den tilrettelegginga/tilpassinga som er nødvendig for at dei skal få oppleva meistring og til­hørig­heit.

I tillegg til padlekurset for Friskusane har klubben blant anna samarbeida med Nav på Frekhaug og gitt symje- og padle­opplæring til unge frå Eritrea. Klubben har også kjøpt inn ti polokajakkar spesielt med tanke på ungdom. Desse er mellom anna brukt på padlekurs for ungdom på Eknes.

Fleire grupper
Som eit ledd i vidare inklu­deringsarbeidsarbeid ønskjer pad­leklubben også å leggja til rette for fleire grupper under andre arrangement i regionen, til dømes under Havsportveka i Austrheim.

«NHP er opptatt av å gje eit tilbod til ungdom som fell utanfor organisert idrett, til dømes når fotballaget skal «toppast». Padleklubben ser det som viktig å tilby ungdom ein arena for meistring og gode opplevingar» skriv idrettskretsen, som håpar at padleklubben når fram og får tildelt inkluderingsprisen for 2011.

Prisen vert delt ut av Norges idrettsforbund, og er eit verkemiddel for å auka statusen og setja fokus på det gode arbeidet som vert gjort i forhold til idrett for funksjonshemma. Prisen skal delast ut kvart år til og med 2015. Tidlegare vinnarar er Norges Bandyforbund, IL Kråkene og Gjellereåsen IF. Prisen på 100.000 kroner skal etter planen delast ut i januar 2012.