Prestisjekamp på damesida

Saman med Horda­bø kjempa dei om dei eine opprykksplassen til tredjedivisjon, og etter at ENK vann begge kampane dei i mellom rykka dei opp.

Stor respekt
ENK sitt unge mannskap har alt spelt ein sesong i tredjedivisjon, som enda med ein imponerande fjerdeplass. No ser dei fram til å møta Hordabø.

– Det er alltid kjekt å møta Hordabø. Dei har eit godt lag som me har stor respekt for, fortel ENK trenar Marius Silseth.
Trass i eit ungt lag klarte ENK sitt mål for førre sesong, som var topp fire. Neste sesong vert målet heva.

– Me går for topp tre, men det er mange gode lag der. Me skal jobba hardt gjennom vinteren for å få det til, og jentene er motiverte, seier Silseth.
ENK vil stabilisera seg i toppen av tredjedivisjon. I det lang løp er målet opprykk til andredivisjon innan 2012.

Første gong
Etter å ha vore overlegne i fjerdedivisjon i fjor tar Hordabø no steget opp i tredjedivisjon for første gong.

– Det vert spennande. I fjerdedivisjon er det mange dårlege lag, og no møter me lag som er gode i kvar kamp. Det vil vera ekstra motiverande for jentene, seier Hordabø-trenar Frode Myking.

Når det gjeldt kampane mot ENK ser han fram til det.

– Det er artig å møta ENK, men eg trur dei legg litt meir i det enn oss. Men me er sjølvsagt lystne på å revansjera tapa frå 2007, seier Myking.