Puddersnø til skitrekkopninga

Idrettslaget Bjørn West har alt hatt skitrekket i drift ei handfull gonger, i samband med testar og opplæring av dei som skal kjøra trekket.
Men søndag var første vanlege opningsdag, og kring 300 reiste til fjells for å prøva nyetrekket. Etter kvart som folk strøymde til, gjekk smila nesten heilt rundt på idrettslaget sine folk.

– No er det like mange her som det var på det meste sist sesong, sa Arne Berg etter ei oppteljing klokka 13.00.
Nokre djerve tankar, gjødsla med dugnadsiver og støttekroner, har gjeve Masfjorden eit tipp topp moderne skitrekk. Og det heilt utan at idrettslaget har sett seg i gjeld.

– Forskotteringa av tippemidlar er det einaste lånet på anlegget, seier Berg.
Arne Berg er dagleg leiar i Stordalen skisenter AS, eit selskap eigd halvt om halvt av Masfjorden kommune og idrettslaget Bjørn West.

– Men det er idrettslaget som tek seg av alt innan drifta av anlegget, seier Berg.
Så er det berre å håpa at vêrgudane tek seg av den snøen som skal til. I helga var det i alle fall topp forhold, med rikeleg puddersnø å svinga seg i, i tillegg til dei preparerte løypene.

550 meter
Nyetrekket er på 550 meter, og tek deg opp frå 500 til 640 meter over havet. Eit kjekt løft for alle som likar nedoverski, men som helst vil sleppa å gå fiskebein opp att.

Det er preparerte løyper på begge sider av det nye hovudtrekket, og så skal det gamle tautrekket brukast til barnetrekk.

– No må me venta på meir snø for å opna barnetrekket, sidan det kryssar ei elv, seier Berg.
Til sommaren er det meininga å leggja denne elva i røyr, slik at barnetrekket kan opnast tidlegare.

På gang
Om mykje er gjort så har idrettslaget framleis ting på gang. Ein toalettkonteiner er undervegs, og søndag vart siste hand lagt på flaumlysanlegget.
– Me skal ha kveldskjøring her kvar tysdag, seier Arne Berg.

Skisenteret har kjøpt inn skiutstyr for utleige, både snøbrett, slalåmski og telemarkski.
– Me har vel 50-60 par med ski, både til store og små, seier Berg.

Alle stilartar var då også i sving i trekket søndag, og det var både folk som var flinke på ski, og dei som skal verta det.

Plass til 45
Med 110 T-krokar i trekket er kapasiteten på kring 45 personar. Søndag fekk idrettslaget testa kapasiteten til fulle, då masfjordingar, gulingar og folk frå heile Nordhordland strøymde til for å testa nyetrekket. Til og med eit par bergensarar hadde svinga til venstre i Vågsbotn, slik at dei hamna i Stordalen i staden for i Eikedalen eller på Voss.

Men bergensarar kan vera brukande til mykje dei og, for det var nettopp to slike som redda journalisten ut frå den snøfonna han hadde parkert i.

550 METER: Trekket har ein kapasitet på 45 personar.