Radøy/Manger i tredje etter Hovding-målfest

Radøy/Manger opna klart best i den andre og avgjerande opprykkskampen, som gjekk på Leikvang gras tysdag. Alt etter to minutt sklir ein Hovdingspelar i det våte graset. Sindre Marøy får ballen igjennom åleine med keeper, og lobbar over og i mål. To minutt seinare fekk Marøy eit innlegg frå Raymond Kviste, og nikka inn 2-0.

Etter sju spelte minutt redu­serte Hovding til 2-1, men oppgåva var alt ganske håplaus sidan heimelaget på dette tidspunkt måtte ha seks mål for å vinna samanlagt.
Med 5-1 til pause var kampen kjørt, men Radøy/Manger gav seg ikkje. Etter kvilen puttar Sindre Marøy sitt fjerde for dagen, og Gisle Mjøs avsluttar til 7-1.

Jubel
I garderoben etter kampen vart champagnen spretta, og Radøy/ Manger kunne jubla for opprykk til 3. divisjon.
Trenar Magnar Fjeld gler seg over opprykk, og over ein god kamp.

– Første omgang var veldig bra av oss, med tidlege mål. Andre omgang vart øydelagt av regnet, men alt i alt ein godt gjennomført kamp, seier Fjeld.

Radøy/Manger blei det laget som skåra mest i 4. divisjon, og toppskårar for laget vart Sindre Marøy, med 25 mål i serien.
– Særleg etter at Marøy kom med, har det vorte ein del mål, seier trenar Fjeld.

Trenaren vil ikkje spå for mykje om 2012-sesongen.
– Det kjem litt an på dei andre laga i avdelinga me skal spela i.

Husbyggar
Målkonge Marøy vert neppe med på alle kampar i 2012, ingeniøren og tømraren skal nem­leg i gang med husprosjekt.

– Eg har ingen andre planar enn å bli i Radøy/Manger. Men eg har eit hus eg skal bygga, så eg trur ikkje at eg får spelt så mange bortekampar, seier Sindre Marøy.

Æra for toppskårartittelen delar han med spissmakker Raymond Kviste.

– Toppskårartittelen kunne like godt gått til Kviste. Me to har fått til eit godt samarbeid, og eg har fått mange pasningar frå han, seier Marøy.

Spissen fekk ein liten smell i foten i første omgang, og vart bytta ut like etter pause. Bytte var det elles rikeleg av, Radøy/ Manger brukte heile 18 spelarar, tre av dei i junioralder.

– Det er kjekt at så mange får spela i dag, seier Sindre Marøy.