Steggsjura sigra i storløp

Eivind og Britt Hege Fjellstad driv Stall Fjellstad øvst i Hopsdalen i Lindås. Dei leiger og trener kaldblodshoppa, som laurdag vann DNT sitt løp for 5-års hopper – eit av dei gjevaste løpa i Noreg.

Avlyste Europa-ferien
Familien på fire hadde planlagt tre veker i bobil rundt i Europa, men ferien rauk då Steggsjura kvalifiserte seg til storløpet for tre veker sidan.

– Då vart det vart hest, hest, hest, i staden. Når ein driv med trav, vert ein veldig overtruisk, så når ein står framfor eit løp gjeld det å halda på rutinane, seier Britt Hege.

Heile familien reiste til løpet med hesten. Dei tok inn på ein gard i Hokksund natta før.

Kontrollerte temperamentet
– Å overnatta i Hokksund gjorde at me kunne kjøra til travbana rett før oppvarminga, slik at ho ikkje stressa seg opp for tidleg, seier Eivind.

Kusk Øyvind Austevoll og Steggsjura hadde vunne kvalifi­seringsløpet lett, men ingen turte å ta noko for gitt i storløpet. Ikkje eingong då Steggsjura storma ned oppløpssida i tet og folk snudde seg for å gratulera dei, klarte Eivind og Britt Hege Fjellstad å tru på at det heile skulle enda så bra. Men hoppa som hadde galoppert i halvparten av løpa sine siste året, takla nervane og trava inn til siger.

Litt enten eller
I dag er det lite som minnar om konkurranse i grøne, sommar­lege Hopsdalen. Steggsjura nyt sola i avslappa positur.

– Slik er ho berre her heime. Med ein gong ho ser ei travbane asar ho seg opp til ho dirrar, seier Britt Hege Fjellstad.

Steggsjura har dei hatt sidan ho var to år. Dei såg med ein gong at ho hadde talent, men ho var litt trøblete. I fjor vår begynte ho å gå løp. Halvparten enda i galopp, men ho vart blant dei tre beste i 15 av 25 løp og vann åtte. Med andre ord, har det vore litt enten eller om ho skulle gjennomføra.

Trivsel gjev utteljing
Tid og tolmod på trening har vore nøkkelen til resultata Stall Fjellstad no kan visa til.

– Det gjeld for oss å roa ho ned og ikkje gira ho opp når ho skal på bana, seier Eivind.

Eivind kjører Steggsjura to gonger i veka. Avkoplinga for hesten er lange dagar på beite og to til tre skogsrideturar med Britt Hege i veka.

– Hestar er som menneske. Dei må trivast for å gjera det bra. Me jobbar mykje med trivselen for hestane me har her, seier Britt Hege.

Feira med biff
Det vart eit sirkus av blomar, journalistar og jubel, då hesten gjekk over målstreken. Den som summa seg først, var sonen Tomas (11).

– No kan me vel eta biff på restaurant! utbraut han, då han forstod at førstepremien på 250.000 kroner var i boks.

Premien vert rett nok delt mellom eigar av hesten, Torill Håvardstun, kusken og Stall Fjellstad, men foreldra synest ikkje at dei kunne nekta sonen livretten sin denne gongen. Premiepengane går elles til å styrka drifta. Den tapte ferien tek dei att med ei veke i syden i vinter.

Spennande framtid
– Først og fremst gir ein slik siger motivasjon til å fortsetja, seier Eivind.

Stall Fjellstad har hatt gode hestar i stallen før, men dette er første gong dei har hatt ein hest som går frå å vera nybegynnar til å skulle kniva i tyngre, tøffare løp så raskt. Steggsjura har hoppa med rundt 318.000 i grunnlaget sitt på to månader, eit kraftig karrierehopp for hoppa. Det betyr spennande tider framover, men Fjellstadane tek det med stor ro.

– Me kjører Steggsjura sjeld­nare i løp enn andre nok ville ha gjort, for å spara litt på ho. Me vil velja løpa framover med omhu og har ikkje fastsett neste løp enno, seier Britt Hege.

– Steggsjura er tøff og sterk, men me skal ta det fint framover, seier Eivind.