Sykkelklubben med triatlon

Per i går var det tretten gutar og seks menn som hadde meldt seg på til konkurransen laurdag. Deltakarane startar med symjing i bassenget i Radøyhallen, deretter er det over på to hjul og sykling inn til Knarvik, før konkurransen vert avslutta med joggesko i Brekkeløypa rundt Knarvik stadion.

– Me har to klassar. Ein klasse har 250 meter i bassenget, 22 kilometer sykkel, og ein runde springing i Brekkeløypa. Den andre klassen har 500 meter i bassenget, 22 kilometer på sykkel og to rundar i Brekkeløypa, seier Øystein L. Iversen i Nordhordland sykkelklubb.

Konkurransen laurdag er for medlemmene i sykkelklubben. For meir info og påmelding sjå klubben si heimeside, www.nord­hordlandsk.no

Første gong
Ein del medlemmer har prøvd seg på triatlon andre stader, men det er første gongen klubben slår til med eit uformelt klubbmeisterskap.

– Tanken er å laga til ei treningsøkt som er ei lita utfordring for folk.

Sykkeletappen går frå Manger via Sæbø til Knarvik, slik at dei unngår strekket med 80-sone.

– Me har ein del foreldre som stiller opp som vakter i løypa. Og elles vil dei eldste deltakarane passa på at alle er med.

Kle seg
Sjølv om det lir ut i oktober, er ikkje Iversen redd for kaldt og vått ver.

– Me var ute og sykla i stiv kuling på måndag, med storm i kasta. Desse karane som skal vera med står for ein støyt, dei kler seg etter veret, seier Iversen med eit smil.

– Etter målgang i Knarvik vert det brus og pizza.

Påmeldingsfristen er i dag torsdag 20. oktober.