Mykje skryt til Eikanger-Bjørsvik i EM

Laurdag kveld blir det avgjort kven som kan kalle seg Europas beste brassband.

Publisert:

Fredag imponerte dei mange med sitt pliktnummer. Laurdag speler Eikanger-Bjørsvik sjølvvalt. Foto: Worldofbrass.tv/skjermskot

  • Erlend Nordland Kristiansen
Denne artikkelen er over ett år gammel

OPPDATERING: Seint laurdag kveld vart det klart at Eikanger-Bjørsvik hamna på tredjeplass i årets brassband-EM i Sveits. Dei fekk ein totalsum på 189, og fekk desidert best betalt poengmessig for pliktnummeret.

Ein stor kontingent med lokale musikantar og heiagjeng er på plass i sveitsiske Montreux, der alle strilar har eit lite håp om at tittelen igjen skal «komme heim».

Fredag var dei i aksjon med sitt pliktnummer, medan den sjølvvalte delen vart unnagjort laurdag formiddag.

Les også

Eikanger-Bjørsvik vann NM

Spent Eikanger-Bjørsvik

Før det heile small i gang fortalde musikklagets leiar, Stig Ryland, om ein spent og glad gjeng i den vesle, idylliske byen.

– Det er kjempebra stemning. Folk er avslappa og veldig fokusert, og vi har hatt ein veldig god oppladning. Eg føler at vi er i god form til å matche dei aller beste.

Totalt er det 13 korps som kjemper om tittelen om å kalle seg Europas beste brassband i Stravinsky Auditorium. Fredag starta det heile med pliktnummeret. Der spelte EBML, anført av Ingar Bergby, «Dear Cassandra».

– Plikten er ganske nyskriven musikk, som er veldig teknisk krevjande. Den stiller høge krav til presisjon og rytme.

Rapportane fortel om god respons i publikum. Ifølge musikksjefen i Norges Musikkorps Forbund var Eikanger-Bjørsvik (EBML) det einaste korpset som fekk spontan ståande applaus etter si framføring fredag.

Laurdag spelte korspa sine sjølvvalte stykker. I 13-tida, som korps nummer fire, spelte Eikanger-Bjørsvik «Concerto Grosso» av Derek Bourgeois til stor applaus.

«This may be one of the best performances I've ever been privileged enough to witness. It would take an extraordinary effort to beat this. I'm blown away. Wow.» uttaler korpssida 4barsrest i sin livefeed.

Les også

Slik starta eventyret for Eikanger-Bjørsvik

Tøff motstand

Sjølv om EBML verkar å vere i slag, skal ein likevel ikkje kimse av konkurrentane. Det er tretten korps som skal kjempe om tittelen, og blant favorittane er regjerande meister Valaisia frå Sveits og walisiske Coryband.

– Valaisia er jo utruleg jamne og gode og Cory leverer alltid i toppen, slår Ryland fast.

Eikanger-Bjørsvik tok sist sigeren i 2017. Då vart det laga til ein heidundrande fest og mottaking på Flesland då EM-heltane landa.

Ryland er også glad for heiagjengen som er med. Dei veiva ivrig med flagga under fredagens pliktnummer. Og det blir ikkje mindre «flagging» laurdag.

– Det er kjekt å ha dei med. Vi har stroke flagga og gjort klare «busserullane» våre, strikkegenserane våre, seier ein smørblid Ryland.

Det var litt av ein fest då Viggo Bjørge, Stig Ryland og EBML kom tilbake til Flesland og Norge etter EM-sigeren sin. Her ikledd sine kledelege «busserulls»-genserar. Foto: Erlend Kristiansen (arkiv)

600.000 i budsjett

På grunn av jobb kom han ned til Sveits først på torsdagen, dagen etter dei andre. For det skal klaffe både med jobb og det økonomiske når ein skal delta i EM. 30 musikantar på tur er ikkje gratis, og dei reiser ikkje akkurat med berre handbagasje heller.

– Me har eit budsjett på rundt 600.000 kroner, men får dekka vel halvparten gjennom sponsorar og offentleg støtte. Elles er det dugnad og sal av EM-kalenderar, seier han.

Sjølv om det økonomiske alltid er ei utfordring, er det aldri tvil om at EBML skal ut å forsvare Norges ære.

– Når vi vinn NM, så veit vi at vi skal til EM neste år, så då må vi berre halde dampen.

Strilen vil sjølvsagt oppdatere frå EM i Sveits. Annonsering av vinnaren blir kjent i løpet av laurdagskvelden. Det går også an å kjøpa seg tilgang til å sjå meisterskapen live via World of Brass.

Foto: Worldofbrass.tv/skjermskot

Publisert:

Les også

  1. 2017: EM-heltane heim til stor hyllest

  1. Korps
  2. Lindås
  3. EBML
  4. Knarvik