– Mange artistar stod plutseleg på bar bakke med ei uviss framtid i sikte. Det såg mørkt ut, seier Taule om marsdagane for eitt år sidan.

Heile kulturnæringa fekk seg ein kalddusj, men etter kvart innsåg artisten frå Hjelmås at ein berre måtte gjere det beste ut av situasjonen.

– Eg kunne ikkje berre sitte og vente på betre tider. Eg måtte i staden bruke tida heime til å ferdigstille albumet eg har arbeidd jamt og trutt med over fleire år, seier ho.

Ho ringde til vener for å høyre kva det ville koste å leige studio. Men det vart for dyrt når no ikkje lenger hadde jamn inntekt.

Løysinga vart at ho skaffa seg sitt eige utstyr og inreidde eit musikkstudio heime. Då kunne ho jobbe døgnet rundt.

50 vart 13

Mykje arbeid vart det. No har ho, frå ein bunke på femti songar, valt ut tretten til det som resulterte i albumet «Black Heart».

– I og med at det var forbode med besøk, var eg heldig at mannen min, Kai Taule, er multiinstrumentell. Han speler bass og gitar på alle låtane.

Tine Taule og Daniel Hauge då dei mixa albumet i studioet Lydetaten. Foto: Privat

Taule har lært av andre lydteknikarar, så no kan ho gjere alt sjølv. Ho tek imot digitale filer frå andre musikarar, redigerer og klipper det saman.

Ho hadde også ein trommeslagar på besøk i studioet som la trommer på alle tretten låtane. Til sist har Daniel Hauge frå Lydetaten i Isdalstø miksa ti av dei.

Tine Taule gjer det meste sjølv for tida. Ho har rigga opp eit eige lydstudio, der ho speler inn, klipper og mixar musikken. Foto: Privat

Gjer alt sjølv

– No har eg fått meg eit studio for alltid. Når eg veit korleis eg skal gjere alt sjølv, er det ein enorm inspirasjon til å ikkje la det gå så lang tid mellom kvar gong eg gir ut musikk.

For å toppe det heile, lagar ho i tillegg alle platecovera ut ifrå sine eigne måleri.

Artisten Tine Taule ga fredag ut si nye plate «Black Heart». Her saman med mannen Kai Taule. Foto: Oliander Taule

– Korleis gir ein eigentleg ut eit album no til dags?

– Det er heildigitalt, utgitt på mitt eige plateselskap, Piper Recordings. Eg skulle gjerne gitt albumet ut på vinyl, men eg har ikkje fått økonomisk støtte til å gjere det med denne plata, seier ho og held fram:

– I staden kjem det på alle strøymetenester, som Spotify, Deezer, Tidal, Apple Music og Youtube. Dette vert ordna av eit digitalt distribusjonsselskap.

Ny historie

– Kva kan vi høyre på det nye albumet?

– «Black Heart» starta som eit konseptalbum der eg byrja skrive på ei historie. Det var ein tematisk tekst der ein følgde eit par frå stormande forelsking til død og elende – og oppstanding.

Etter at korona kom, laga Taule så mange nye låtar at ho måtte lage ei ny historie.

– Fokuset no er å hylle kor fin kjærleiken kan vere.

Taule legg til at det trass alt er godt å vere musikar i Noreg, samanlikna med mange andre land i Europa no.

– Det slo meg kor heldig eg er som er i Noreg. Og i og med at mannen min er deltaktig på plata, ville eg hylle kjærleiken vår i tekstleg form, seier Taule.

Albumet kom ut fredag 4. juni, og laurdag 12. juni vert det sleppkonsert på Ole Bull scene i byn. Om ikkje reglane endrar seg fram til då, vert det då mogleg å ha 200 publikummarar i salen.