Rundt klokka 05.40 natt til laurdag fekk nødetatane melding om brann på Knarvik ungdomsskule. Nokon hadde høyrt ein alarm og kjent litt røyklukt, og ringde derfor brannvesenet.
Sjå bilda: Mogleg innbrot og påsett brann på Knarvik ungdomsskule
Branntilløp
Det viste seg snart at det hadde vore branntilløp to stadar inne på skulen, blant anna i ei bøtte.
Ifølge vaktkommandør ved 110 Hordaland, Håkon Myking, kom politiet først fram til skulen. Dei gjekk i innsats med eit pulverapparat fortel han, og derfor var det ikkje flammar å ta hand om for brannvesenet då dei kom fram like etter.
– Brannvesenet gjekk i innsats og søkte inne på skulen, seier Myking, men ingen personar var i bygget.
Kan vere påsett
Politiet gjorde seg ferdig på staden i løpet av natta. Dei mistenkte at ei kvinne kan ha stått bak branntilløpet. Politiet skal ha komme i kontakt med henne i nærleiken av skulen, opplyste operasjonsleiar Tatjana Knappen i Vest politidistrikt til BT.
Søndag formiddag var det ikkje kjent kva status denne kvinna har.
Ei stor rute ved hovudinngangen var blitt knust. Inne i bygget kunne ein lukte eimen av røyk.
Også restverdiredningsbil var innom skulen i løpet av morgontimane for å redde verdiar. Ved 9.30-tida jobba eit skadeservice-firma med å lufte ut og rydde opp etter nattas hending.