Reagerer på varslingssak: «Svært betenkeleg»
FNB-generalen i Alver krev full opprydding i varslingssaka frå gamle Meland kommune.
Morten Klementsen er kommunestyrerepresentant for Folkeaksjonen Nei til mer Bombenger (FNB) i Alver. Foto: Henrik Hauken (arkiv)
- Kaspar Knudsen
I mars kom det fram at ein kommunal leiar i gamle Meland kommune hadde godkjent rekningar som ho ikkje burde ha godkjent.
Denne veka gjekk mannen som varsla om kritikkverdige forhold i kommunen, Paal Tonning, ut og fortalde si side av saka i avisa Nordhordland.
Der kjem det fram at Tonning meiner han er blitt degradert til ei lågare stilling i kommunen som følgje av varslinga.
«Krava til habilitet er brote ved utbetalingar frå kommunen»
– Tøft gjort av Paal
Morten Klementsen, kommunestyrerepresentant for FNB i Alver, reagerer på utviklinga i saka.
I eit innlegg på Facebook skriv Klementsen at tilfellet med Tonning er svært betenkeleg og må granskast vidare.
Han understrekar at han ikkje vil førehandsdøma nokon i saka.
– Men det er tøft gjort av varslaren å stå fram på denne måten. Eg applauderer folk som tør å vera varslarar i vår tid. Generelt sett er det alt for vanskeleg, seier Klementsen til Strilen.
Granskning
Klementsen peikar på at saka ikkje er ferdig handsama av kontrollutvalet i Alver.
– Om det er riktig det som Tonning fortel, så har det skjedd klare brot på arbeidsmiljøloven. No må vi avventa kva som skjer vidare i saka. I neste veke skal kontrollutvalet møtast for å drøfta dette. Det blir spanande å sjå kva dei kjem fram til.
Klementsen seier han har ringt og snakka med Tonning etter intervjuet i Nordhordland.
– Eg tok ein telefon til han for å ytra mi støtte. Det må vera beintøft å stå i ei slik sak. Han gav også uttrykk for at han har det vanskeleg, seier Klementsen.
Fleire har tatt kontakt
Tysdag 26. mai er varslingssaka tema i kontrollutvalet i Alver kommune.
I utvalet, som består av sju medlemmer frå partia i kommunestyret, har Folkeaksjonen Nei til mer Bompengar både leiar og nestleiar.
– Eg har sjølvsagt konktakt med partifellar òg om denne saka. Fleire har tatt kontakt med kontrollutvalet om kritikkverdige forhold i gamle Meland kommune. No får vi berre venta og sjå kva som skjer vidare, seier Klementsen.
