Brannsjefane i Austrheim, Radøy, Lindås, Meland og Modalen innfører totalforbod mot å gjera opp eld utandørs, gjeldande frå og med tysdag 17. juli klokka 08:00.
Bakgrunnen er alle utrykkingane dei siste dagane, der det fleire stader har teke fyr i terrenget ulike stader.
– Forbodet gjeld til me har hatt nedbør av betyding, heiter det i ei melding frå brannsjefane.
Det vert kunngjort når forbodet er oppheva.
Totalforbodet mot å gjera opp eld utandørs inneber at:
– Det er ikkje lov å tenna opp små kaffibål, eingongsgrillar, kulegrillar, bålpanner, gassgrillar, stormkjøkken og andre kokeapparat med brennstoff utandørs.
– Det er ikkje lov å grilla eller tenna opp bål i nærleik av skog og mark.
– Det er ikkje lov å tenna bål eller grilla i strandsona.
– Det er ikkje lov å tenna opp bål eller grilla på dei vanlegvis godkjente og tilrettelagde bål- og grillplassane.
– Det er ikkje lov å brenna hageavfall, sjølv på eigen tomt.
Forbodet gjeld ikkje:
Kontrollert bruk av gassgrill og el- grill i eigen hage.
Men all anna grilling er forbode!