Torsdag 14. juni kjem Kronprins Haakon og Kronprinsesse Mette-Marit til Lindås, og gjer fleire stopp hjå lokalt næringsliv.

Først besøker Kronprinsparet Industriutvikling Vest, der dei møter gründermiljøet som er etablert i «Dampen».

Dagleg leiar i Industriutvikling Vest, Børge Brundtland, ser fram til å vera vertskap for Kronprinsparet.

– Det er svært gledeleg at Kronprinsparet ønskjer å besøka gründermiljøet vårt. Me gler oss til å presentera nye gründerar og nyskapingsprosjekt frå vår region for Kronprinsparet, seier Børge Brundtland.

IUV: Dei tilsette hjå Industriutvikling Vest, frå venstre Hanne Sæle, Børge Brundtland, Vidar Grindheim og Heidi Therese Hansen. Foto: IUV

Etter besøket hos Industriutvikling Vest skal Kronprinsparet vidare til Knarvik Industri og Miljø AS (KIM). Dette er ei vekstbedrift eigd av Lindås kommune, som gjev tilbod til 30 personar som treng tilpassa arbeidsoppgåver. KIM produserer varer og tenester som vert omsette i Nordhordlandsregionen, og selskapet har spesielt fokus på viktige samfunnsoppgåver som gjenvinning og det å halda nærområdet fritt for søppel.

Dagen vert avslutta med kongeleg besøk hjå Hillesvåg Ullvarefabrikk AS. Ullvarefabrikken fyller 120 år i 2018.