Torsdag formiddag melde politiet om innbrot i fleire bustadar og garasjar i Kubbaleitet i Isdalstø.
Tjuvgods i telt
Eit par, ei kvinne i 40-åra og ein mann i 30-åra, vart pågripen og sett i fengsla forvaring i Bergen.
– Paret skal ha blitt observert i området. I natt skal ein huseigar blant anna ha oppdaga dei to i leilegheita si, seier operasjonsleiar Morten Rebnord.
Det mistenkte paret skal ha stole eigedelar frå fleire eigedommar, blant anna ein husnøkkel.
– Om det er innbrot eller om ein har gått inn opne dører, er ikkje kjent.
Paret skal ha sett opp eit telt i området. I dette skal fleire av dei stolne tinga ha blitt funne.
Sett lite og ingenting
Fleire naboar hadde ikkje fått med seg at det hadde vore tjuvpakk i nabolaget.
– Eg er tidleg oppe og plar no sjå ut, men eg har ikke fått med meg noko mistenkeleg, seier Terje Kallekleiv, som bur like oppom Kubbaleitet.
Han fortel vidare at dette er eit stille og roleg nabolag.
– Eg veit ikkje om noko anna enn då det var tjuvar i garasjen her og stal bensin frå bilen til faren vår. Det var for femti år sidan, seier han og ser på broren sin og ler.
Håkon Reigstad i Reigstad Bygg og Eigedom hadde heller ikkje sett så mykje. Firmaet hans arbeider for tida med Alverparken, som er det store utbyggingsprosjektet som skal binda Alvermarka og Isdalstø saman.
– Me har ikkje sett nokon her og me saknar ingenting, seier han.