Ni tilfelle av kikhoste i Lindås

Gode råd om kikhoste

På nettsida si har Lindås kommune lista opp ei rekkje råd til utsette grupper. Desse er:

Vi kan ikkje fjerne kikhostesmitten frå befolkninga. Vi må rekne med at det alltid finst barn eller vaksne som skil ut smittestoffet. Ein pasient med kikhoste er særleg smitteførande den første veka etter symptomstart. Etter dette blir smitta mindre. Pasienten kan ikkje smitte andre tre veker etter symptomstart.
I ein husstand der det er påvist kikhoste, bør sårbare personar ta kontakt med fastlege for førebyggjande behandling med antibiotika. Sårbare grupper kan vere uvaksinerte eller delvis vaksinerte barn under to år, uvaksinerte (uansett alder) med alvorleg astma, personar med medfødt hjartefeil eller nedsett immunforsvar.
For ikkje‐fullvaksinerte barn under 2 år kan det også være aktuelt å gi ny vaksinedose.

Desse gruppene treng ikkje førebyggjande behandling eller ny vaksinasjon

Barn under 5 år som har følgt barnevaksinasjonsprogrammet
Barn, ungdom og vaksne som har fått ein oppfriskningsdose med kikhostevaksine i løpet av dei siste fem åra.

Råd til gravide

Gravide: Det er ikkje farleg for gravide å bli smitta av kikhoste. I fleire land i dag rår ein til vaksine til gravide som ikkje er fullvaksinerte, eller det er gått meir enn 5‐10 år sidan siste dose med kikhostevaksine. Dette er berre for å verne barnet mot smitte frå mor i nyføddtida. I Norge er ein slik vaksinering foreløpig ikkje innført.

Fastlegen må vurdere behovet for antibiotikabehandling hos andre med påvist sjukdom i forhold til kor lenge sjukdommen har vart og i forhold til kor plagsom sjukdommen er for den einskilde.

Tiltak i barnehage og skule

Ved behandling tidleg i sjukdomsforløpet blir pasienten smittefri innan 5 dagar etter at behandlinga er sett i gang, og barn bør difor vere heime frå barnehagen i denne perioden. Ved behandling seinare i sjukdomsforløpet, vil smitterisikoen vere betydeleg mindre, og barn kan difor gå i barnehage eller skule dagen etter at behandlinga er starta. Friske nærkontaktar som får førebyggande behandling treng ikkje å være heime frå barnehage.

Råda er utforma i samarbeid med Folkehelseinstituttet.

Til saman ni personar i kommunen har testa positivt på kikhostesmitte dei siste vekene, melder Lindås kommune på sine nettsider.

Kraftige hosteanfall

Kikhoste er ein smittsam sjukdom som vert forårsaka av bakterien Bordetella pertussis.

– Den startar som regel med typiske symptom på forkjølelse, som mild hoste, snørr og lett feber, og så etter 1–2 veker kjem hosteanfalla. Eit typisk kikhosteanfall vert kjenneteikna av hostekuler som kjem i serier og som vert avslutta med ein kraftig innpust. Ein «kikende» lyd. Hosteanfalla kan vera så kraftige at barnet blir både raudt og blått i ansiktet. Naseblødning og sprengte blodkar på augo er heller ikkje uvanleg, og hosten er ofte verst om natta, kan ein lesa på nettstaden Norsk helseinformatikk.

Dei fleste er vaksinerte

Dette er ein av sjukdommane som ein vaksinerer mot i barnevaksinasjonsprogrammet. Ein reknar med at vaksinen gir omlag 85 prosent vern mot sjukdommen. Det betyr at det i nokre tilfelle vil vera barn som er vaksinert som får sjukdommen.

Lindås kommune opplyser at vaksinasjonsdekninga i kommunen er høg, men sidan det er registrert ein del tilfeller i kommunen den siste tida, så går dei no ut med litt informasjon om sjukdommen.

– Dersom dei vaksinerte blir sjuke, er sjukdommen som regel mildare og meir kortvarig. Dei fleste tilfelle av kikhoste blir meldt hos eldre barn, vaksne og eldre. Symptoma er langvarig hoste, men ofte utan den karakteristiske kikinga. Det ser ut til at antibiotika har ei viss effekt, spesielt tidleg i forløpet, men sjukdomen går til slutt over av seg sjølv, skriv kommunen.

Grunnen til at ein vaksinerer barn mot kikhoste er at sjukdommen kan vera farleg for små spedbarn.