SISTE: Vegen skal no vera opna for trafikk melder Vegtrafikksentralen.
I 12.15-tida måndag fekk politiet melding om at ein buss hadde kjørt i ein bil bakifrå ved ved Åse-krysset, like etter Isdalsgardane. Alle naudetatar rykka ut til staden inkludert luftambulanse.
Tre skadde
Klokka 12.33 fortel operasjonsleiar i Vest politidistrikt, Terje Magnussen at det var to personbilar og ein buss involvert, og at fire personar var skadde. Det var då snakk om at eitt barn var involvert i ulukka, og at ein av dei skadde var delvis medvitlaus. Det har seinare blitt korrigert at det var tre - og ikkje fire - som var skadde etter ulykka.
– Det med barnet kan eg ikkje stadfesta, men den delvis medvitlause personen er kjørt til Haukeland i ambulanse medan dei andre skadde er frakta til Nordhordland legevakt. Tilstanden til dei skadde er så langt ikkje kjent.
Den eine bilen hadde ein hengar med sauer som sprang i alle retningar etter ulukka. Den eine måtte slaktast på staden, fortel Magnussen. Veterinær blei tilkalla og kom relativt kjapt til staden.
Ukjent årsak
Vegen var stengt i over éin time før ein opna for trafikk igjen. Fleire av det som skal ha vore busspassasjerar blei frakta vekk i ein minibuss.
Det vart store materielle skadar på bilane. Sauehengaren skal ha blitt trykt opp i «bakenden» på bilen den høyrde til.
Korleis ulukka har skjedd, kan Magnussen ikkje svara på.
– Alt eg veit er at det skjedde i krysset til Åse. Korleis to bilar vart involverte i ulukka i tillegg til bussen, veit eg ikkje enno, seier han.