Slaget om Nordhordland: – Deilig å score, og deilig å vinne

NBK – Radøy, 3–0: I knallvêr på Knarvik Stadion blei det, som venta, både bluss og litt ekstra folk på tribunen.

Ikkje heilt dei same scenene som i 2019, men likevel «En fin dag for fotball», som Arne Scheie ville sagt, med nokre hundre tilskodarar.

For publikum leverte. «Heia Radøy» runga over tribunen i første omgang, og NBK svara med både flagg og NBK-rop.

Radøy stod godt mot NBK dei første 40 minutta. Så dukka Adrian Osa Sellevold opp.

Då rakna Radøy-forsvaret, som elles hadde god kontroll på kampen, sjølv om dei ikkje presterte all verdas framover på bana.

Tre minutt etterpå fekk Andreas Bøe Snekkevik endeleg scoringa si. Han var for anledninga var plassert heilt på topp sidan målgrossist Tommy Gaustad var skada.

Etter kvilen fekk Sellevold nok ein scoring godkjent, sjølv om halve Radøy ropte på offside. NBK vann fortent 3–0 i solskinet i Knarvik.

– Det var lenge sidan eit derby, så kjekt å vinne 3–0. Det var kjempedeilig med mål, og det er ekstra deilig når vi slår Radøy, sa matchvinnar Sellevold til Strilen etter kampen.

Han får støtte av NBK-trenar Henning Vetås.

– Det er ekstra stas å slå Radøy. Dette er lokaloppgjer og kampen om Nordhordland. Det betyr litt ekstra, men det er tre poeng i banken og det er det viktigaste.

Han meiner NBK hadde kontroll i 80 prosent av kampen.

– Vi er veldig fornøgde. 3–0 er solid.

Radøy-trenar Ola Jøsendal sa i pausen til Strilen at det dei måtte spele litt meir om dei skulle snu kampen, og at det var ein fin øving.

– Eg synest vi har god kontroll den første halvtimen. Så får dei to mål tampen av første omgang, seier Jøsendal, og legg til at den tredje scoringa burde vore annullert for offside.

Radøy ville med siger kome heilt i ryggen på NBK. Tre poeng bak, med ein kamp mindre spelt.

– No må vi jobbe på i haust, så vi framleis er i denne divisjonen, seier Jøsendal og smiler.