Fylte nesten Knarren på folkemøte om ny kraftlinje

Det er sendt ut oransje farevarsel – altså stor fare – for skog-, gras- og lyngbrann i Vestland fylke og delar av Rogaland denne veka.

Blant anna gjeld dette Nordhordland og Bergen, viser oversiktskartet til varsom.no.

Varselet gjeld frå måndag 20. mai til laurdag 25. mai.

Vestlendingar som tenker å avslutte langhelga med grilling, bør derfor unngå tørr vegetasjon.

– Ikkje bruk eld. Følg lokale myndigheiters instruksjonar. Behov for førebyggande tiltak og beredskap skal blir vurdert fortløpande av beredskapsaktørar, står det i varselet.

I løpet av tysdag morgon skal nokon ha stole alle premiane til nasjonaldagen frå samfunnshuset i Austrheim.

«Ei trasig melding på ein torsdag, som me deler på vegner av arrangementskomiteen for 17. mai på Austrheim. Kanskje er det ein tjuv eller to som vil gjera opp for seg, og komma tilbake med tinga?», skriv Austrheim kommune på Facebook.

«Tenkte du at du skulle komme på 17. mai på samfunnshuset i morgen?

Da må vi dessverre meddele at noen har stjålet flere premier (gavekort og div annet), skuddene til luftgevær, fartsmåleren til ballskudd, pilene til pilkast, hammerne og litt annet.

Vi anbefaler de som har vært klåfingret til å komme tilbake til samfunnshuset med tingene nå i kveld da vi lager til enda.

Hilsen skuffet 17. mai-komité».

Elektroforeningen deler årleg ut pris til menneske som er ein rollemodell innafor bransjen. Målet er, ifølgje foreininga si heimeside, å rette søkjelys på mangfald, kjønnsbalanse og likestilling i bransjen.

I år er Heidi Lie, forbundssekretær hjå EL og IT-forbundet Norge, ein av tre nominerte for prisen. Ho er nominert for andre gong.

– I år har eg, saman med andre tidlegare finalistar samarbeidd med fleire andre for å få til mellom anna eit fagleg seminar for kvinner på Eliaden (stor fagmesse), og eit eige seminar der ein set mangfaldsleiing på agendaen i elektrobransjen, seier Lie.

Ho synest det er hyggeleg å bli nominert.

– Det er jo kjekt at den jobben ein gjer vert lagt merke til. For det at ein snakkar høgt om faget, kvinner i bransjen, rekruttering og det å behalde både kvinner og menn i denne kule bransjen som eg er så stolt over å få vere ein del av, er jo kjekt.

Lie er frå Brekke i Gulen og bur på Frekhaug.

Bua Frekhaug blir til Bua Knarvik i løpet av sommaren.

«BUA Frekhaug flyttar til Knarvik og opnar att der 25. juni. Vi treng meir plass og det får vi her. Det betyr meir utstyr, moro, utlån og aktivitet. Du kjem til å finne oss vis-à-vis Helsehuset», skriv dei på si Facebook-side.

Det er i det gamle «polbygget» i Knarvik at Bua Knarvik no skal oppstå.

Det betyr dermed at det populære Bua-tilbodet på Frekhaug, som heldt til i den gamle brannstasjonen, forsvinn.

I Alver er det også Bua på Manger.

Bua er ei utlånsordning der kven som helst kan leige sports- og fritidsutstyr gratis.

– Bua er som eit kinderegg. Vi inkluderer, driv med folkehelse og aktivitet og tenker på berekraft og forbruk, har tilbodet tidlegare blitt beskrive som av Håvard Hauge i Bua.

Åtte lokale artistar har samla yndlingssalmane sine og trommar saman til konsert i bøkeskogen ved Vallevika i Seim, laurdag 25. mai.

– Vi er ein gjeng kvinnelege artistar som er «heiagjeng» for kvarandre og møtest ein gong i månaden, seier Rismyhr Jansen.

– Og eg har alltid hatt ein drøym om å ha konsert i bøkeskogen og så hadde eg lyst til å ha ein i salmekonsert. Dette nemnde eg for dei andre, og så slo vi to fluger i éin smekk.

Konserten vart så godt motteken i fjor at dei åtte damene har samla nye yndlingssalmar.

– I fjor måtte vi flytte arrangementet inn i kyrkja på grunn av regnet, så vi håpar på betre lukke i år, seier ein av artistane May Sissel Rismyhr Jansen.

– Valet fall på salmar fordi vi alle har eit sterkt forhold til dei, gjennom vår felles tru. Men eg trur at det er noko med salmar som betyr noko for mange, uansett tru, seier Rismyhr Jansen.

Ho framhevar også at samarbeid med grunneigar Kari Anne Romarheim har betydd mykje for det praktiske.

I tillegg må eg seie at det å stå saman på konsertscenene og ikkje åleine, slik fleire av oss ofte gjer, er veldig fint.

Vêret var ikkje på deira side i fjor, men i år har dei sikra seg med telt og tarpar, så i år blir konserten ute, uansett vêr.

– Folk får kle seg godt om ikkje vêret slår til, avsluttar Rismyhr Jansen, som gler seg til konsert.

Ho har med seg Ingelin Reigstad Norheim (Garness), Hanne Vatnøy (HAVA), May Sissel Rismyhr Jansen (May Sissel), Stine Karin Sæle, Vibeke Bjørndal Midttun, Ingrid Helene K. Raunehaug (Ingrid Helene), Kamilla Strømsbo Dale og Jaemie Callender Walde (Jaemie Gina).

Det er ikkje mogeleg å nå Frekhaug legesenter på telefon i dag, onsdag 15 mai, melder Alver kommune.

Dette skuldast sjukdom.

«Pasientar kan nytte e-melding for beskjed og reseptbestillingar. Om det ikkje hastar kan ein ringe torsdag. Ved akutt sjukdom eller skade vert pasientar oppmoda om å ringja legevakta i Knarvik», skriv kommunen.

Hamre på Osterøy har i 1000 år vore ein samlingsplass, og var i tidlegare tider også kyrkjestad for folk på vår side av fjorden.

Flatøy, og området frå Knarvik og vidare inn til Eikangervåg var del av Hamre kommune heilt fram til 1964. Då Hamre kommune var størst i utstrekning, var også mesteparten av Åsane, Holsnøy (Frekhaug-området) og ein del av Askøy ein del av Hamre.

25. og 26. mai vert det stor jubileumsfest på Hamre, og i samband med dette inviterer ro- og seglgruppa i IL Kvernbit folk til å vera med å ro over fjorden.

– Det vert ein rotur med tradisjonsbåtar, oselvar, kyrkjebåt og vikingskip frå Knarvik til Hamre, fortel Atle Bergseth i ro- og seglgruppa.

Han oppfordrar folk som er interesserte i å vera med til å ta kontakt. Dei reknar med å bruka 45–60 minutt på roturen, og dersom det er mange som vert med så vil dei i tillegg til tradisjonelle robåtar bli brukt eit større vikingskip.

– Dette blir ei flott oppleving og me håper mange vert med over, seier Bergseth.

Båtane vil returnera til Knarvik etter at markeringa og festgudstenesta på Hamre er over.

Alver kommune er venta å få 32 millionar kroner meir å rutta med i 2025, og deretter 22 millionar kroner meir i året, skriv avisa Nordhordland.

Endringa kjem som følgje av det nye inntektssystemet for kommunar som regjeringa legg fram neste veke.

- Dei (kommunane, red. anm.) som er veldig rike må bidra litt meir, og me som er skattesvake får litt meir tilført. Kanskje får me ei litt meir rettferdig fordeling av inntektene, seier Alver-ordførar Sara Hamre Sekkingstad (Sp) til NH.

Så mykje kan dei andre kommunane få:

«Ein innbyggjar på Toftegård har sendt kommunen dette bildet av vatn tappa tysdag morgon. Det er ikkje noko arbeid på gang i regi av kommunen som kan forklara misfarginga», melder Austrheim kommune tysdag formiddag.

Dei melder at om du har misfarga vatn i krana, så «må du tappa kaldt vatn, i den krana som er nærast vassinntaket til huset, og sjå om det hjelper etter litt tid».

Dei legg til at fargen kan skuldast avleiringar inne i leidningane lausnar og fargar vatnet.

Aksjonsgruppa «Få opp kvikksølvet», som primært består av ein gjeng radværingar, hadde møtt opp på Knarvik kai måndag morgon.

Det var ikkje vanskeleg å sjå, då dei er kledd i sine turkise «Få opp kvikksølvet U-864»-t-skjorter.

Dei har blitt trykt opp i 180 eksemplar, men dei vil aldri bli heilt utselt. For er det tomt, får dei trykt opp nye.

– Vi har brukt desse t-skjortene når vi var vore på Fedje og møtt ordføraren og leiaren for aksjonsgruppa der ute, og når vi var i by'n på One Ocean Week. Då prøver vi å forklare folk kva vi står for og halde saka varm, seier Tine Mangerøy, som bur på Manger.

Gjengen var heller lunkne til det dei fekk «servert» på Knarvik kai og vil nok ikkje gje seg før kvikksølvet er heilt borte.

– Eg håpar dei tar Forsvaret med, med omsyn til torpedoar og det som har vore ein redselssak for dei, seier Mona Vaktskjold.

Inge Alver, president i Nordhordland Rotary, var blant dei som hadde tatt turen til Knarvik kai måndag morgon.

Rotaryklubben er ein av fleire krefter som har stått på for å få til eit gjennombrot med ubåten, då i form av av å få kvikksølvet opp og vekk. Tidlegare har dei sendt brev til statsministeren om å få kvikksølvet opp.

Og beskjeden på Knarvik kai om at kvikksølvet skal opp og vekk, blir tatt godt imot – med litt atterhald:

– Det er positivt at det blir tatt ei beslutning om å følge ekspertutvalets sine anbefalingar, men det er eit veldig laust vedtak. «Så mykje som mogleg». Kor mykje er det? Og kven er det som bestemmer kva som er så mykje som mogleg? Det er ingen grunn til å lette på trykket i denne saka.

– Så ingen blautkake i dag?

– Absolutt ikkje, men forventning.

Fiskeri- og havminister Marianne Sivertsen Næss (Ap) og barne- og familieminister Kjersti Toppe (Sp) kunngjorde måndag morgon at ein vil følge opp ekspertutvalets konklusjon om å hente opp så mykje som mogleg av kvikksølvet.

Den tyske ubåten blei senka av britane nokon kilometer utanfor Fedje 9. februar 1945. Heile mannskapet på 73 omkom. Ifølge historiske dokument kan ubåten ha frakta 67 tonn kvikksølv.

Vraket på 150 meters djupne blei oppdaga i 2003. I åra etterpå har fleire regjeringar forsøkt å finne ut kva ein skal gjere med det. Det er greia ut ulike løysingar: Å heve vraket, å dekke det til utan å hente ut lasta og å fjerne kvikksølvet før vraket blir dekt til.

Les meir her: Regjeringa vurderer om kvikksølvet ved Fedje kan fjernast

Like før klokka 08 måndag morgon samla eit 30-tals sjeler seg på Knarvik kai i anledning at fiskeri- og havminister Marianne Sivertsen Næss (Ap) og barne- og familieminister Kjersti Toppe (Sp) skal fortelja siste nytt om Fedje-ubåten.

Både Fedje-ordførar Stian Herøy (Ap), Alver-ordførar Sara Sekkingstad (Sp) og fylkesordførar Jon Askeland (Sp) er til stades.

Det same er ein gjeng som vil ha heving av ubåten. Det har blant anna blitt lagt ut eit større banner langs kaikanten.

Les også: Fedje-ordførar trur på kvikksølv-fjerning

Strilen oppdaterer.

Fiskeri- og havminister Marianne Sivertsen Næss (Ap) og Barne- og familieminister Kjersti Toppe (Sp) har kalla inn pressa på måndag for å fortelje kva regjeringa vil gjere med kvikksølvet som ligg i ubåten utanfor Fedje, melder BT søndag.

Eit ekspertutval har tidlegare anbefalt å fjerne den giftige lasten. Det skal vere rundt 67 tonn med kvikksølv i nazi-ubåten, som blei senka av britane i 1945.

Ordførar på Fedje, Stian Herøy er optimist og trur at kvikksølvet no blir fjerna frå havbotn.

– Det har lenge vore snakk om at regjeringa no ville kome med positive nyheiter til Fedje-samfunnet. Signala eg har fått gjer at eg håpar og trur på ei endeleg avklaring, og at avgjerda blir at kvikksølvet hentast opp, seier Herøy til Bergens Tidende.

Ein viktig del av kampen mot arbeidslivskriminalitet er å hindre at useriøse leverandørar får oppdrag. Difor har Alver kommune og Skatteetaten inngått ein avtale som skal førebygge at slike leverandørar får avtalar med kommunen», opplyser Alver kommune i ei melding.

Dei legg til at avtalen gjeld for kommunen som innkjøpar og byggherre.

– Vi ser fram til dette samarbeidet. Det vil styrke kommunen sin kompetanse innan internkontroll, og gi ein tryggleik i at vi gjer det vi kan for å unngå at useriøse leverandørar får avtalar med kommunen. Vi får hjelp frå Skatteetaten og kan tipse dei slik at dei kan gjennomføre kontrollar på byggjeplassar, fortel innkjøpssjef i Alver kommune, Henriette Dale Bråthen.

– I samarbeid med store innkjøparar som kommunane, kan vi bidra til at useriøse leverandørar ikkje får oppdrag. Difor er slike avtalar eit viktig verkemiddel i kampen mot arbeidslivskriminalitet, seier skattekrimsjef Erik Nilsen i Skatteetaten.

For 13. gong har Mongstad industriar, i samarbeid med Nordhordland næringslag, invitert yrkesfagelevar til det årlege Nordhordlandsmesterskapet i sveising.

I årets konkurranse kjem elevane frå Austrheim, Knarvik, Osterøy og Åsane vidaregåande skuler.

– I konkurransen får dei møte andre elevar og fagpersonar som driv med det same som dei og det kan verke inspirerande, seier Jon Sigurd Lundestad, HMS og HR leiar på Mongstad industriar.

Årets sigrar gjekk til Robin S.L. Helland som går førsteåret på Austreim vidaregåande skule, og Oliver Espeland som går andreåret på Knarvik vidaregåande skule.

– Oppgåvene gjekk ut på grunnleggjande sveisearbeid som dei har lært på skulen, seier Lundestad og til:

– Men det er ikkje først og fremst konkurranseelementet som har fokus. Det vi synest er viktig er at elevane får kome ut for å få litt inspirasjon ved å sjå korleis det er å utøve faget på ein arbeidsplass.

I helga vart det annonsert at Medaasprisen for 2024 går til den velkjende artisten Bjørn Eidsvåg.

«Han sluttar aldri å utfordre oss, er aldri redd for å gå nye vegar. Det er ei bragd å vinne tilliten frå stadig nye generasjonar», står det på DNS si side.

Seinare i år, 7. oktober, skal det vere festkonsert på DNS med blant anna Jan Eggum, Sigrid Moldestad og Garness på scena, i tillegg til Eidsvåg sjølv.

Medaasprisen er meint å heidra utøvande kunstnarar som i Ivar Medaas si ånd tek utgangspunkt i lokale musikalske tradisjonar og som brukar eigen dialekt. Medaasprisen er ein bronseplakett av Os-kunstnaren Arne Mæland og 25.000 kroner.

Siste fem års vinnarar: Mari Boine (2023), Sigvart Dagsland (2022), Ingebjørg Bratland (2021), Hellbillies (2020), Kari Bremnes (2019)

Tradisjonen tru markerer vi frigjeringsdagen 8. mai. Her lokalt er det blant anna markeringar på Mjømna i Gulen, på Fedje og i Kvamsvågen i Alver.

Fylkesordførar og radværing Jon Askeland var med å markere dagen på Espeland fangeleir i Arna. Der la han ned krans på minnesmerket over fangane som heldt til der under krigen.

I talen snakka han om kor viktig det var å markere frigjeringsdagen i dei tidene vi lever i i dag.

– Med slutten på 2. verdskrig var det likevel ikkje slutten på krig. Vi har statsleiarar med eit forkasteleg menneskesyn. Mange stader i verda blir folk frårøva fridomen sin. Historia er vår beste læremeister. Alt dette er med på å forsterka betydninga av å markera freden, sa Askeland.

Tysdag 14. mai mellom klokka 18.30 og 20 blir E39 Skrikebergtunnelen nord i Gulen stengt.

Grunnen er at Statens vegvesen i lag med Gulen og Masfjorden brann og redning skal ha ei brannøving i tunnelen.

Berre utrykkingskøyretøy og bussar i rute får passere.

Før og etter øvinga vil det vere kolonnekøyring gjennom tunnelen i samband med opp- og nedrigging.

– Beredskapsøving i tunnelar er eit døme på ei planlagd og naudsynt stenging. Ved å øva saman med naudetatane drillar vi våre rutinar og sørger for at beredskapslinjene er best mogleg førebudde den dagen ein situasjon skulle inntreffa, seier brannvernleiar Ove Edgar Amundsen i Statens vegvesen i ei pressemelding.

Tunnelen har dei siste åra, som mange andre tunnelar, blitt rusta opp til nye krav.